შალვა პაპუაშვილი: ბრიუსელის ბიუროკრატია მოქმედებს გარედან თავს მოხვეული დღის წესრიგით, სერიოზული მოლაპარაკებების მონაწილე არ არის, თავადაც აღნიშნავენ, რომ უფრო მენიუშია, ვიდრე მაგიდასთან ზის

ყველა ვხედავთ, სამყაროც აკვირდება, უპირველეს ყოვლისა, ევროკავშირის შიგნით მოქალაქეები ხედავენ, რომ ბრიუსელი და ევროკავშირის დღევანდელი ბიუროკრატია აცდენილი არიან ევროპელი ხალხის ინტერესებს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, ბრიუსელის ბიუროკრატია დღეს მოქმედებს გარედან თავს მოხვეული დღის წესრიგით, რომელიც აბსოლუტურად არ შეესაბამება ევროპელი ხალხის ინტერესებს.

„შედეგებიც ჩანს ევროკავშირისთვის, რომელიც სერიოზული მოლაპარაკებების, განხილვების მონაწილე არ არის. თავადაც ხშირად აღნიშნავენ, რომ ევროკავშირი უფრო მენიუშია, ვიდრე მაგიდასთან ზის. ამ ხატოვან გამოთქმას თავად ევროპელები იყენებენ. ამიტომ, საქართველოსთან მიმართებაშიც, ვიდრე ეს ბიუროკრატიაა, რთულია, ვიფიქროთ, რომ შესაძლებელი იქნება ურთიერთობის კარდინალური გამოსწორება. გამიზნული დაზიანებაა ქართველი ხალხის. ევროკავშირის გუშინდელი პოსტიც ამის გამოხატულებაა. ამით აჩვენებენ, რომ სინამდვილეში სხვა გეგმებია. იქნებ მორჩნენ ვირეშმაკობას და თქვან პირდაპირ, რომ ხელისუფლების შეცვლა არის მათი მიზანი და ეს არის მთავარი პრობლემა, რომელსაც ვერ აგვარებენ. ქართველი ხალხი ყოველ ჯერზე სცემს საკადრის პასუხს ყველას, ვინც ცდილობს, გარედან მოახვიოს არჩევანი. მარცხდებიან და შემდეგ გვაქვს ბრაზის სახით რაღაც გამოვლინებები“, – განაცხადა პაპუაშვილმა.