საკითხი, რომელიც უკავშირდებოდა ნარკოტესტის გავლის მოხსნას პარლამენტის წევრობის კანდიდატებისთვის, ამოღებულია და რჩება ძალაში რედაქცია, რომ პარლამენტის წევრობის კანდიდატებს მოუწევთ ნარკოტესტის ჩაბარება - ოხანაშვილი

ანტიკორუფციულ ბიუროს ამ წარმოდგენილი პროექტით, ვენეციის კომისიის რეკომენდაციების გათვალისწინებით, ვაძლევთ ეფექტიანი ადმინისტრირების მექანიზმებს, - ამის შესახებ იურიდიულ საკითხთა საპარლამენტო კომიტეტის თავმჯდომარე ანრი ოხანაშვილმა ჟურნალისტებს განუცხადა.

საკითხი ეხება „სპეციალური საგამოძიებო სამსახურის“, „კორუფციის წინააღმდეგ ბრძოლისა“ და „საერთო სასამართლოების შესახებ“ კანონში შესატან ცვლილებებს, რომელიც 9 ნაბიჯის შესრულების ფარგლებშია მომზადებული და მას იურიდიულ საკითხთა კომიტეტმა დღეს მეორე მოსმენით მხარი დაუჭირა.

„ის საკითხი, რომელიც უკავშირდებოდა ნარკოტესტის გავლის მოხსნას პარლამენტის წევრობის კანდიდატებისთვის, ეს პუნქტი ამოღებულია და რჩება ძალაში მოქმედი რედაქცია, რომ პარლამენტის წევრობის კანდიდატებს მოუწევთ ნარკოტესტის ჩაბარება. არსებული რედაქცია, რომ უფლებამოსილების ვადამდე შეწყვეტის საფუძველი არის ანტიკორუფციული ბიუროს უფროსის, თუ ის მოიხმარს ნარკოტიკს ან უარს იტყვის ნარკოტესტის გავლაზე, ესეც ძალაში რჩება.

რაც შეეხება სპეციალურ საგამოძიებო და პერსონალურ მონაცემთა დაცვის სამსახურების გაძლიერებას, აქ ვენეციის კომისიის სწორება იყო, რომ სამსახურების ხელმძღვანელების ხელშეუხებლობის გარანტიები გაგვეძლიერებინა და გავაძლიერეთ, დაკავებასა და დაპატიმრებას სჭირდება წარმოდგენილი ცვლილებებით არა 50 ხმა, არამედ 76 ხმა.

პროკურორის მიერ კონკრეტული მუხლებით გათვალისწინებული დანაშაულის ჩადენის შემთხვევაში, პროკურორის მიერ თუ მოხდა ეს, ექნება გამოძიების წარმოების უფლებამოსილება.

რაც შეეხება სასამართლოს, სასამართლოსთან დაკავშირებით საუბარი იყო იმაზე, რომ ღია სასამართლო სხდომაზე მიღებული აქტები, ნებისმიერი გადაწყვეტილება ყოფილიყო ხელმისაწვდომი მოქალაქისთვის და ეს ხელმისაწვდომი გახდება.ასევე, საკითხი შეეხებოდა, რომ იუსტიციის უმაღლეს საბჭოში ერთდროულად არ მომხდარიყო საბჭოს წევრების არჩევა და აქ შემოთავაზებული გვაქვს, რომ ოთხზე მეტი წევრის არჩევა არ შეიძლება ერთდროულად რომელიმე ექვსთვიან პერიოდში საბჭოში, საბჭოს მიერ და პარლამენტის მიერ“,- განმარტა ანრი ოხანაშვილმა.