ირაკლი ჭეიშვილი - რადიკალების რეალურ სახეს ვხედავთ, რაც ეროვნულ ინტერესებთან თანხვედრაში არ არის, სახელმწიფო მოწოდების სიმაღლეზეა, რათა ანტისახელმწიფოებრივი განზრახვები აღიკვეთოს

რადიკალების რეალურ სახეს ვხედავთ, რაც ქვეყნის ეროვნულ ინტერესებთან თანხვედრაში არ არის. მთავარ საკითხად ხელისუფლების რევოლუციური გზით ხელში ჩაგდებას განიხილავენ, რასაც აღსრულება არ უწერია, – ამის შესახებ საპარლამენტო უმრავლესობის წევრმა, ირაკლი ჭეიშვილმა განაცხადა.

ჭეიშვილის თქმით, სახელმწიფო მოწოდების სიმაღლეზეა, რათა ანტისახელმწიფოებრივი განზრახვები აღიკვეთოს.

„რადიკალები ოქსიმორონების ტყვეობიდან ვერ გამოდიან, რადგან ურთიერთშეუთავსებელია სიტყვები – მშვიდობიანი დამხობა. როგორც ჩანს, მათ სითამამე არ ჰყოფნით, რომ მაინცდამაინც დამხობაზე თუ ლაპარაკობენ, გარკვეული წანამძღვარი არ გაუკეთონ. მეორე მხრივ, საზოგადოებამ იხილა, რომ არ შეიძლება, რადიკალებისგან მშვიდობიანი პროტესტის მოლოდინი ჰქონდეთ. ამას ადასტურებს რევოლუციის მოწყობის მცდელობები თუ წამოცდენები, რომ ისინი მთავარ საკითხად ხელისუფლების რევოლუციური გზით ხელში ჩაგდებას განიხილავენ. ამას აღსრულება არ უწერია, საზოგადოება მოცემულობას კარგად აფასებს. საუბრობდნენ, რომ მზად იყვნენ კოალიციური მმართველობისთვის, მაგრამ ყველა ხედავს, რა მასშტაბის პოლიტიკურ ფარისევლობასთან გვქონდა საქმე. მათ სახელისუფლო ბერკეტები არ აქვთ, ერთმანეთთან ვერ თანხმდებიან და სააშკარაოზე ისეთი თემები გამოაქვთ, რაც მათსავე კულუარებში უნდა დარჩეს. რადიკალების რეალურ სახეს ვხედავთ, რაც ქვეყნის ეროვნულ ინტერესებთან თანხვედრაში არ არის და ვერ იქნება. სახელმწიფო მოწოდების სიმაღლეზეა, რათა ანტისახელმწიფოებრივი განზრახვები აღიკვეთოს“, – განაცხადა ირაკლი ჭეიშვილმა.