ტრამპი: რუსეთის მხრიდან დათმობები არის დაპირება, რომ შეწყვეტენ ბრძოლას და აღარ აიღებენ მეტ ტერიტორიას

აშშ-ის პრეზიდენტმა, დონალდ ტრამპმა განაცხადა, რომ რუსეთი დათმობებზე მიდის უკრაინის ომის დასრულების თაობაზე მოლაპარაკებებში, ხოლო კიევი კმაყოფილია იმით, თუ როგორ მიმდინარეობს მოლაპარაკებები.

ჟურნალისტებთან საუბრისას Air Force One-ის ბორტზე, ტრამპმა აღნიშნა, რომ შეთანხმებაზე „პროგრესს ვაღწევთ“ და განაცხადა, რომ მზად იქნება შეხვდეს როგორც ვლადიმირ პუტინს, ასევე ვოლოდიმირ ზელენსკის, მას შემდეგ, რაც ისინი შეთანხმებასთან ახლოს იქნებიან.

მან ასევე თქვა, რომ ადრე გამოცხადებული დედლაინი - ხუთშაბათი, ანუ მადლიერების დღე - ძალაში აღარ იყო, და რომ თეთრი სახლის თავდაპირველი 28-პუნქტიანი სამშვიდობო გეგმა, რომელმაც კიევში ასეთი შეშფოთება გამოიწვია, „უბრალოდ საგზაო რუკა იყო“.

კითხვაზე, მოთხოვეს თუ არა უკრაინას ძალიან დიდი ტერიტორიის დათმობა, ტრამპმა მიანიშნა, რომ „შემდეგი რამდენიმე თვის განმავლობაში [ეს ტერიტორია] შესაძლოა რუსეთს ისედაც ხელში ჩაეგდო“.

ტრამპის თქმით, მოსკოვის მხრიდან დათმობები არის დაპირება, რომ შეწყვეტენ ბრძოლას და აღარ აიღებენ მეტ ტერიტორიას.