ტრამპი მაია სანდუს: 1-ლი აგვისტოდან, მოლდოვიდან აშშ-ში გაგზავნილ ყველა მოლდოვურ პროდუქტზე 25%-იან ტარიფს დავაწესებთ - სავაჭრო დეფიციტი სერიოზულ საფრთხეს უქმნის ჩვენს ეკონომიკას და, რა თქმა უნდა, ჩვენს ეროვნულ უსაფრთხოებას

აშშ-მა მოლდოვიდან იმპორტირებულ საქონელზე 25-პროცენტიანი საბაჟო ტარიფები დააწესა. ამის შესახებ აშშ-ის პრეზიდენტმა დონალდ ტრამპმა განაცხადა.

„ჩვენ წლები გვქონდა მოლდოვასთან ჩვენი სავაჭრო ურთიერთობების განსახილველად და დავასკვენით, რომ უნდა გავთავისუფლდეთ ამ გრძელვადიანი და ძალიან მუდმივი სავაჭრო დეფიციტისგან, რომელიც გამოწვეულია მოლდოვის სატარიფო და არასატარიფო პოლიტიკითა და სავაჭრო ბარიერებით“, - ნათქვამია წერილში, რომელიც დონალდ ტრამპმა მოლდოვის პრეზიდენტს, მაია სანდუს გაუგზავნა.

„2025 წლის 1-ლი აგვისტოდან, მოლდოვიდან შეერთებულ შტატებში გაგზავნილ ყველა მოლდოვურ პროდუქტზე მხოლოდ 25%-იან ტარიფს დავაწესებთ, ყველა სექტორული ტარიფისგან განცალკევებით. მაღალი ტარიფის თავიდან ასაცილებლად გადაზიდული საქონელი დაექვემდებარება ამ მაღალ ტარიფს. გთხოვთ, გაითვალისწინოთ, რომ 25%-იანი მაჩვენებელი გაცილებით ნაკლებია იმაზე, რაც საჭიროა თქვენს ქვეყანასთან არსებული სავაჭრო დეფიციტის უთანასწორობის აღმოსაფხვრელად“, - აღნიშნულია წერილში.

ტრამპის თქმით, ტარიფი არ დაწესდება, თუ მოლდოვა, ან მოლდოვაში არსებული კომპანიები, გადაწყვეტენ პროდუქტის შეერთებულ შტატებში აწყობას ან წარმოებას.

„თუ რაიმე მიზეზით გადაწყვეტთ ტარიფების გაზრდას, მაშინ, რა რიცხვითაც არ უნდა აირჩიოთ მათი გაზრდა, ის დაემატება ჩვენ მიერ დაწესებულ 25%-ს. გთხოვთ, გაითვალისწინოთ, რომ ეს ტარიფები აუცილებელია მოლდოვის სატარიფო და არასატარიფო პოლიტიკისა და სავაჭრო ბარიერების გამოსასწორებლად, რაც იწვევს ამ არამდგრად სავაჭრო დეფიციტს შეერთებული შტატების წინააღმდეგ. ეს დეფიციტი სერიოზულ საფრთხეს უქმნის ჩვენს ეკონომიკას და, რა თქმა უნდა, ჩვენს ეროვნულ უსაფრთხოებას!“ - განაცხადა აშშ-ის პრეზიდენტმა.