ორბანი ურსულა ფონ დერ ლაიენს LGBTQ+ პრაიდის ჩატარების მოთხოვნის გამო ქვეყნის შიდა საქმეებში ჩარევაში ადანაშაულებს

მოვუწოდებ ევროკომისიას, თავი შეიკავოს წევრი სახელმწიფოების საკანონმდებლო ორგანოების საქმიანობაში ჩარევისგან, სადაც მას არანაირი როლი არ აქვს. ასე გამოეხმაურა უნგრეთის პრემიერ-მინისტრი, ვიქტორ ორბანი ევროკომისიის პრეზიდენტის, ურსულა ფონ დერ ლაიენის განცხადებას, სადაც მან უნგრეთის ხელისუფლებას LGBTQ+ პრაიდის ღონისძიებების ჩატარების დაშვებისკენ მოუწოდა.

„ასევე მოვუწოდებ კომისიას, ძალისხმევა ევროკავშირის წინაშე არსებული აქტუალური გამოწვევებისკენ მიმართოს - სფეროებზე, სადაც მას ნამდვილად აქვს მკაფიო როლი და პასუხისმგებლობა და სადაც ბოლო წლებში სერიოზული შეცდომები დაუშვა, როგორებიცაა ენერგეტიკული კრიზისი და ევროპული კონკურენტუნარიანობის შესუსტება“, – წერს უნგრეთის პრემიერ-მინისტრი სოციალურ ქსელში.

ცნობისთვის, ფონ დერ ლაიენმა გუშინ ვიდეომიმართვა გაავრცელა, სადაც უნგრეთის ხელისუფლებას მოუწოდებდა ბუდაპეშტში პრაიდის ჩატარება დაეშვა.