ირლანდია, ესპანეთი და ევროკავშირის სხვა ქვეყნები პალესტინის დამოუკიდებელ სახელმწიფოდ აღიარებას აპირებენ მედია

ირლანდია, ესპანეთი და ევროკავშირის სხვა ქვეყნები პალესტინის დამოუკიდებელ სახელმწიფოდ აღიარებას აპირებენ, – ამის შესახებ ინფორმაციას ესპანური მედია ავრცელებს.

მედიის ცნობით, ოფიციალური გადაწყვეტილება შესაძლოა, 21 მაისამდე იყოს მიღებული.

ირლანდიამ, ესპანეთმა, სლოვენიამ და მალტამ მარტში გაავრცელეს ერთობლივი განცხადება, რომ ისინი მზად არიან, აღიარონ პალესტინის სახელმწიფოებრიობა, როდესაც „შესაბამისი პირობები იარსებებს“.

ინფორმაცია იმის შესახებ, რომ ევროკავშირის ქვეყნების ნაწილი პალესტინის დამოუკიდებელ სახელმწიფოდ აღიარებას აპირებს, იმ ფონზე გავრცელდა, როდესაც ევროკავშირის ლიდერები ისრაელის მიერ ქალაქ რაფაჰში წამოწყებულ სამხედრო ოპერაციაზე საპასუხო ნაბიჯებს განიხილავენ.

მანამდე, 67 ევროდეპუტატმა წერილით მიმართა ევროკავშირის ლიდერებს, ამ საკითხზე საგანგებო შეხვედრა გამართონ. ევროდეპუტატები ევროკავშირის ისრაელის წინააღმდეგ სანქციების შემოღებას ითხოვენ.