Axios: ტრამპმა უკრაინის შესახებ უახლეს სამშვიდობო მოლაპარაკებებს გასულ კვირას დაუდო სათავე, მას შემდეგ, რაც ვენსმა და რუბიომ განაცხადეს, რომ ახალმა 28-პუნქტიანმა გეგმამ შესაძლოა გარღვევა მოიტანოს

აშშ-ის პრეზიდენტმა, დონალდ ტრამპმა უკრაინის შესახებ უახლეს სამშვიდობო მოლაპარაკებებს გასულ კვირას დაუდო სათავე, მას შემდეგ, რაც ვიცე-პრეზიდენტმა ჯეი დი ვენსმა და სახელმწიფო მდივანმა მარკო რუბიომ განაცხადეს, რომ ახალმა 28-პუნქტიანმა გეგმამ შესაძლოა გარღვევა მოიტანოს. ამის შესახებ ადმინისტრაციის ოფიციალურმა პირებმა გამოცემა Axios-ს განუცხადეს.

აღნიშნულია, რომ ეს შეხვედრა გაიმართა თეთრ სახლში 18 ნოემბერს და საფუძველი გახდა ჟენევაში მოლაპარაკებებისთვის. სწორედ მაშინ ტრამპმა ამერიკის არმიის მდივანს, დენ დრისკოლს ურჩია ეს წინადადება უკრაინისთვის მიეწოდებინა. ის მაშინ უკვე გეგმავდა კიევში ვიზიტს, რათა შეეფასებინა უკრაინელთა საბრძოლო მზადყოფნა და საბრძოლო სულისკვეთება.

ჟურნალისტების წყაროს ცნობით, დრისკოლის მისიის მიზანი იყო ბრძოლის ველზე არსებული მიმდინარე ვითარების შეფასება სამხედროებთან უშუალო ურთიერთქმედების გზით.

გამოცემა წერს, რომ ჟენევაში მოლაპარაკებების დროს, აშშ-ისა და უკრაინის დელეგაციებმა 28-პუნქტიანი სია 20-მდე შეამცირეს და არსებით ურთიერთგაგებას მიაღწიეს 18 პუნქტთან დაკავშირებით. დანარჩენი ორი პუნქტი საჯაროდ არ განხილულა, რადგან ეს იყო „სენსიტიური საკითხები“. ჟურნალისტები აღნიშნავენ: „ეს ორი საკითხი, როგორც ჩანს, უკავშირდება ტერიტორიებს და უკრაინისთვის უსაფრთხოების გარანტიებს“.

მნიშვნელოვანია, რომ უკრაინის 28-პუნქტიანი გეგმა აშშ-ის პრეზიდენტის სპეციალურმა წარმომადგენელმა, სტივ უიტკოფმა და ტრამპის სიძემ, ჯარედ კუშნერმა შეიმუშავეს. ამის შემდეგ ვენსმა და რუბიომ დოკუმენტი განსახილველად მისაღებად ჩათვალეს და თეთრ სახლში მოიწვიეს შეხვედრა, რათა ტრამპის თანხმობა მიეღოთ.

გამოცემის წყაროს თქმით, „ეს არ იყო უბრალოდ დოკუმენტი“.

„ეს იყო დოკუმენტი, რომელსაც ახლა უნდა დაეწყო პროცესი“, - თქვა მან.