მსოფლიო • 1783336560

მორგში გადაყვანილი და გარდაცვლილად გამოცხადებული ბავშვი გაცოცხლდა - საქმე პროკურატურას გადაეცა (უცხოეთი)

აშშ-ში, არიზონას შტატში, მორგში წლინახევრის ბავშვი ცოცხალი იპოვეს. ამის შესახებ ABC 15 იტყობინება.თებერვალში ბავშვი სასწრაფოდ გადაიყვანეს სამედიცინო ცენტრში მას შემდეგ, რაც ის აუზში კინაღამ დაიხრჩო. საავადმყოფოში ექიმმა არიან ტუსიმ ის გარდაცვლილად გამოაცხადა, თუმცა მედდამ ბავშვის პულსის გაინჯვა შეძლო. ერთ-ერთმა პოლიციელმა კი მისი სუნთქვაც კი გაიგონა. ოფიცრის თქმით, მან ამის შესახებ ტუსის შეატყობინა, მაგრამ ექიმმა მათ არ მოუსმინა და ბავშვის მორგში გადაყვანის განკარგულება გასცა.  სიცოცხლის ნიშნებს სხვა პოლიციელებიც ამჩნევდნენ მაშინაც კი, როდესაც ბავშვი მორგში გადაასვენეს. თუმცა, ტუსი კვლავ თავის ვერდიქტზე ჯიუტად იდგა. ექიმის შეცდომის შესახებ მხოლოდ რამდენიმე საათის შემდეგ გახდა ცნობილი, როდესაც სასამართლო-სამედიცინო ექსპერტებმა დაადგინეს, რომ ბავშვი სუნთქავდა.ბავშვი სასწრაფოდ გადაიყვანეს ბავშვთა საავადმყოფოში. იქ გაირკვა, რომ სამედიცინო დახმარების გარეშე გატარებულმა  საათებმა ბავშვის ტვინის დაზიანება გამოიწვია. მას მთელი ცხოვრების განმავლობაში დასჭირდება მოვლა. საქმე პროკურატურას გადაეცა.

სამართალი • 1783331378

ალეკო ელისაშვილის საქმეზე განაჩენი 10 ივლისს გამოცხადდება

ტერორისტული აქტის ჩადენის მცდელობის ბრალდებით დაკავებული პოლიტიკოსის, „ძლიერი საქართველო - ლელოს“ ერთ-ერთი ლიდერის, ალეკო ელისაშვილის საქმეზე განაჩენი 10 ივლისს გამოცხადდება.დღევანდელ სხდომაზე ბრალდების მხარემ დასკვნითი სიტყვა წარმოთქვა. პროკურატურა გამამტყუნებელი განაჩენის გამოტანას ითხოვს, დაცვის მხარე კი, ელისაშვილისთვის წარდგენილ ბრალდებაში მის გამართლებას.ცნობისთვის, ალეკო ელისაშვილს ბრალდება საქართველოს სისხლის სამართლის კოდექსის 19-323-ე მუხლის პირველი ნაწილით წარედგინა, რაც ტერორისტული აქტის ჩადენის მცდელობას გულისხმობს. აღნიშნული ქმედება სასჯელის სახედ და ზომად 10-დან 15- წლამდე თავისუფლების აღკვეთას ითვალისწინებს.ალეკო ელისაშვილს ბრალდება კიდევ ერთ ეპიზოდზე სისხლის სამართლის კოდექსის 19-323-ე მუხლის პირველი ნაწილით აქვს წარდგენილი, რაც ტერორისტულ აქტს, ესე იგი აფეთქებას, ცეცხლის წაკიდებას, ადამიანზე თავდასხმას, იარაღის გამოყენებას ან სხვა ქმედებას გულისხმობს ჩადენილს ტერორისტული მიზნით, რომელიც ადამიანის სიცოცხლის მოსპობის, მნიშვნელოვანი ქონებრივი ზიანის, ან სხვა მძიმე შედეგის განხორციელების საშიშროებას ქმნის.დანაშაული 10-დან 15-წლამდე ვადით თავისუფლების აღკვეთას გულისხმობს.

სამართალი • 1783153140

სასამართლომ გიორგი მალანიას აღკვეთის ღონისძიების სახით პატიმრობა შეუფარდა

გიგა ავალიანის საქმის ფიგურანტ გიორგი მალანიას აღკვეთის ღონისძიების სახით პატიმრობა შეუფარდეს.მას ბრალად ახალგაზრდა მასწავლებლის ჯგუფურად ჯანმრთელობის განზრახ მძიმე დაზიანებაში დახმარება ედება.პროკურატურა პატიმრობას ითხოვს. უწყების განმარტებით, ბრალდებული ლანჩხუთში დააკავეს, სადაც მიმალვაში იყო. ბრალის დამტკიცების შემთხვევაში მალანიას 13 წლამდე თავისუფლების აღკვეთა ემუქრება.„ბრალდებულ გ.მ.-ს მიმართ პროკურატურას შემოტანილი აქვს შუამდგომლობა აღკვეთის ღონისძიების სახით პატიმრობის შეფარდების თაობაზე. პროკურატურა პატიმრობას ითხოვს, რადგან არსებობს აღკვეთის ღონისძიების გამოყენების როგორც ფაქტობრივი, ასევე ფორმალური საფუძველი. ფაქტობრივი საფუძველი არის იმ მტკიცებულებათა ერთობლიობა, რომლებიც საქმეშია წარმოდგენილი. ფორმალური საფუძველი არის მტკიცებულებების განადგურების, თავიდან აცილების საფრთხე და ასევე, მიმალვის საფრთხე. ვითხოვთ იმიტომ, რომ აღნიშნული საფრთხეები არსებობს აღნიშნული ბრალდებულის მიმართ. მისი დაკავება მოხდა გადაუდებლად, რადგან ის აპირებდა მიმალვას. იმყოფებოდა ლანჩხუთში ერთ-ერთ სოფელში და სწორედ მიმალვის მცდელობისას იყო დაკავებული“, - აღნიშნა ჟურნალისტებთან პროკურორმა, ქეთევან სონიძემ.როგორც ცნობილია, გიორგი მალანია 1 ივლისს დააკავეს. თავდაპირველად ცნობილი იყო, რომ მას ბრალად განსაკუთრებით მძიმე დანაშაულის შეუტყობინებლობა ედებოდა. თუმცა, 3 ივლისს პროკურატურამ გიორგი მალანიას ბრალდება გიგა ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე წარუდგინა.

მსოფლიო • 1783096740

რეჯეფ თაიფ ერდოღანისა და რელიგიური ღირებულებების შეურაცხყოფის ბრალდებით დაკავებულ თურქ კომიკოსს პატიმრობა შეეფარდა

თურქეთის პრეზიდენტის, რეჯეფ თაიფ ერდოღანისა და რელიგიური ღირებულებების შეურაცხყოფის ბრალდებით დაკავებულ თურქ კომიკოსს, დენიზ გოქთაშს აღკვეთის ღონისძიების სახით პატიმრობა შეეფარდა. ინფორმაციას ამის შესახებ „ვაშინგტონ პოსტი“ ავრცელებს.მედიის ცნობით, რამდენიმე დღით ადრე პროკურატურამ მისი სასცენო გამონათქვამების გამო გამოძიება დაიწყო.სტამბოლის მთავარი პროკურატურის ინფორმაციით, გამოძიება მიმდინარე კვირის დასაწყისში მას შემდეგ დაიწყო, რაც სოციალურ ქსელებში გოქთაშის მიერ გავრცელებულ კონტენტში „დანაშაულებრივი გამონათქვამები“ გამოვლინდა. პოლიციამ ის თურქეთში დაბრუნებისას სტამბოლის აეროპორტში დააკავა,პროკურატურის ცნობით, გოქთაშმა რელიგიური ღირებულებები სტამბოლში გამართული სტენდაფ წარმოდგენის დროს შეურაცხყო, სადაც ის ერდოღანს, ყურანსა და დაპატიმრებულ სტამბოლის მერს, ეკრემ იმამოღლუს შეეხო. გოქთაშის ადვოკატის, მეტინ ასლანის განცხადებით, ბრალდებებს შორის პრეზიდენტის შეურაცხყოფაც ფიგურირებს.პოლიციისთვის მიცემულ ჩვენებაში გოქთაშმა ბრალდებები უარყო. მისი თქმით, ხუმრობები არც რელიგიური ღირებულებებისა და არც ყურანის მიმართ შეურაცხყოფას არ წარმოადგენდა. გოქთაშის განცხადებით, ერდოღანის „დიქტატორად” მოხსენიება პოლიტიკური განსაზღვრება იყო და არა შეურაცხყოფა.

სამართალი • 1783090949

არასრულწლოვანის გაუპატიურების და გარყვნილი ქმედების ფაქტებზე ბრალდებულს უვადო პატიმრობა მიესაჯა

ბათუმის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და არასრულწლოვანის გაუპატიურების და გარყვნილი ქმედების ფაქტებზე ბრალდებული დამნაშავედ ცნო, - ამის შესახებ ინფორმაციას პროკურატურა ავრცელებს.„სამართალდამცველებმა ბრალდებული 2025 წლის 6 ნოემბერს დააკავეს. მას ბრალდება საქართველოს სისხლის სამართლის კოდექსის 137-ე მუხლის მე-4 ნაწილის „გ“ ქვეპუნქტით (გაუპატიურება, ჩადენილი დაზარალებულის უმწეობის გამოყენებით, წინასწარი შეცნობით არასრულწლოვნის მიმართ) და 141-ე მუხლის მე-2 ნაწილის „დ“ და „ვ“ ქვეპუნქტებით (გარყვნილი ქმედება დამნაშავისთვის წინასწარი შეცნობით თოთხმეტი წლის ასაკს მიუღწეველი ორი პირის მიმართ) წარედგინა.ბათუმის საქალაქო სასამართლომ ბრალდებული სრულად ცნო დამნაშავედ წარდგენილ ბრალდებაში და სასჯელის სახედ და ზომად უვადო თავისუფლების აღკვეთა განუსაზღვრა“, - ნათქვამია ინფორმაციაში.

სამართალი • 1783086915

გიგა ავალიანის დედა: პროკურატურა სამართლიანად იბრძვის ჩემთან ერთად

პროკურატურა სამართლიანად იბრძვის ჩემთან ერთად, - განაცხადა გიგა ავალიანის დედამ, ეკა კუპატაძემ.ეკა კუპატაძე ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე გიორგი მალანიასთვის ბრალდების წარდგენას სწორ გადაწყვეტილებას უწოდებს.„მე ველოდებოდი მუხლის გადაკვალიფიცირებას და პროკურატურამ დიახ, სწორი გადაწყვეტილება მიიღო ბრალის დამძიმებასთან დაკავშირებით. შვილმკვდარ დედას და მით უმეტეს სადისტურად შვილმოკლულ დედას, არაფერი აძლევს შვებას, მაგრამ, ოდნავ მაინც თუ შეიძლება ცოტა შვილის წინაშე მართალი იყო, სწორედ ეს არის, რომ პროკურატურა სამართლიანად იბრძვის ჩემთან ერთად“, - აღნიშნა კუპატაძემ.როგორც ცნობილია, გიორგი მალანია 1 ივლისს დააკავეს. თავდაპირველად ცნობილი იყო, რომ მას ბრალად განსაკუთრებით მძიმე დანაშაულის შეუტყობინებლობა ედებოდა. თუმცა, დღეს პროკურატურამ გიორგი მალანიას ბრალდება გიგა ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე წარუდგინა.

სამართალი • 1783076338

„მიყვარხართ! მიყვარხართ!“ - გიგა ავალიანის დედის რეაქცია პროკურატურის გადაწყვეტილებაზე

გიგა ავალიანის დედა ეკა კუპატაძე ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე გიორგი მალანიასთვის ბრალდების წარდგენას სწორ გადაწყვეტილებას უწოდებს.ეკა კუპატაძემ „ქრონიკისგან“ სატელეფონო საუბარში შეიტყო, თუ რომელი მუხლით წარედგინა ბრალი გიორგი მალანიას.„მიყვარხართ! მიყვარხართ! მიყვარხართ!", - ასეთი იყო ეკა კუპატაძის რეაქცია პროკურატურის მიერ წარდგენილ ბრალდებაზე.„პროკურატურამ მიიღო დიახ, სწორი გადაწყვეტილება. საქმე გაჯერებულია უხვად პირდაპირი და ირიბი მტკიცებულებებით, მყარი, უტყუარი მტკიცებულებებით. შესაბამისად, მე პროკურატურისგან ამ სწორ გადაწყვეტილებას ნამდვილად ველოდი“, - განუცხადა ეკა კუპატაძემ სატელეფონო საუბარში „ქრონიკას“.როგორც ცნობილია, გიორგი მალანია 1 ივლისს დააკავეს. თავდაპირველად ცნობილი იყო, რომ მას ბრალად განსაკუთრებით მძიმე დანაშაულის შეუტყობინებლობა ედებოდა. თუმცა, დღეს პროკურატურამ გიორგი მალანიას ბრალდება გიგა ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე წარუდგინა.

სამართალი • 1783073797

პროკურატურამ მოხელის მიერ დიდი ოდენობით ქრთამის აღების ფაქტზე, ერთ პირს ბრალდება წარუდგინა

საქართველოს პროკურატურამ მოხელის მიერ დიდი ოდენობით ქრთამის აღების ფაქტზე, ერთ პირს ბრალდება წარუდგინა. ინფორმაციას პროკურატურა ავრცელებს.ფინანსთა სამინისტროს საგამოძიებო სამსახურის მიერ ჩატარებული გამოძიებით დადგინდა, რომ სსიპ „შემოსავლების სამსახური“-ს საბაჟო დეპარტამენტის საბაჟო გამშვები პუნქტი „წითელი ხიდი“-ს ცვლის უფროსმა, თანამდებობრივი უფლება-მოვალეობების შესრულებისას სამსახურებრივი მფარველობის სანაცვლოდ - საქართველოს საბაჟო საზღვარზე განსაკუთრებით დიდი ოდენობით უცხოური ვალუტის უკანონო გადმოტანის უზრუნველსაყოფად, მოითხოვა და ქრთამის სახით აიღო მოთხოვნილი თანხის ნაწილი - 4 000 აშშ დოლარი.დაკავებულს ბრალდება საქართველოს სისხლის სამართლის კოდექსის 338-ე მუხლის მე-2 ნაწილის „ბ“ ქვეპუნქტით (ქრთამის აღება დიდი ოდენობით) წარედგინა, რაც სასჯელის სახედ და ზომად 11 წლამდე თავისუფლების აღკვეთას ითვალისწინებს.პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა.

სამართალი • 1783070379

პროკურატურა გიგა ავალიანის მკვლელობის საქმეზე განცხადებას ავრცელებს

გიგა ავალიანის სისხლის სამართლის საქმიდან გამოყოფილ საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე გიორგი მალანიას ბრალდება წარედგინა. ინფორმაციას პროკურატურა ავრცელებს.საქართველოს შინაგან საქმეთა სამინისტროში, საქართველოს პროკურატურის ზედამხედველობით ჩატარებული გამოძიებით დგინდება, რომ 2025 წლის სექტემბერში ალექსანდრე გაბაშვილმა გიორგი რიკაძესთან და დემეტრე ჩიქოვანთან ერთად გიგა ავალიანზე ჯგუფურად თავდასხმა დაგეგმეს.ამ მიზნით დაადგინეს გიგა ავალიანის პიროვნება, შეამოწმეს მისი სოციალური ქსელი, საიდანაც გადმოტვირთეს ფოტო იმისათვის, რომ აღექვათ და დაემახსოვრებინათ ვიზუალურად.გიორგი მალანიას დახმარებით, რომელიც გიგა ავალიანის მოსწავლე იყო, გაარკვიეს მისი სამუშაო და საცხოვრებელი ადგილის მისამართები, შეისწავლეს მისი სამუშაო გრაფიკი, რა გზით გადაადგილდებოდა სამსახურიდან სახლში. შეარჩიეს განზრახვის შესრულების ადგილი და დაიწყეს თვალთვალი.2025 წლის 29 სექტემბერს, საღამოს საათებში ალექსანდრე გაბაშვილი, გიორგი რიკაძე და დემეტრე ჩიქოვანი ანგარიშსწორების მიზნით მივიდნენ თბილისში, ზღვის უბნის დასახლებაში მდებარე სასწავლო ცენტრთან, სადაც მოაწყვეს ჩასაფრება და ყველა პირობა ჰქონდათ შექმნილი თავდასხმის მოსაწყობად, თუმცა ამ დღეს მათგან დამოუკიდებელი მიზეზის გამო განზრახვის სისრულეში მოყვანა ვერ შეძლეს.2025 წლის 1 ოქტომბერს ალექსანდრე გაბაშვილის, გიორგი რიკაძის და დემეტრე ჩიქოვანის მიერ შემუშავებული გეგმის მიხედვით, ალექსანდრე გაბაშვილი და გიორგი რიკაძე ჯგუფურად თავს დაესხნენ გიგა ავალიანს, რომელმაც ჯანმრთელობის მძიმე დაზიანება მიიღო, რის შედეგადაც 2025 წლის 24 ოქტომბერს სამედიცინო დაწესებულებაში გარდაიცვალა.სამართალდამცველებმა ბრალდებული 1 ივლისს დააკავეს. მას ბრალდება საქართველოს სისხლის სამართლის კოდექსის 25, 117-ე მუხლის მე-3 ნაწილის ,,ლ’’ ქვეპუნქტით (ჯგუფურად ჯანმრთელობის განზრახ მძიმე დაზიანებაში დახმარება) წარედგინა, რაც სასჯელის სახედ და ზომად 13 წლამდე თავისუფლების აღკვეთას ითვალისწინებს.პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.საზოგადოებას შევახსენებთ, რომ ზემოთ აღნიშნული დანაშაულების ჩადენისთვის ალექსანდრე გაბაშვილი, გიორგი რიკაძე და დემეტრე ჩიქოვანი მსჯავრდებულები არიან.სისხლის სამართლის საქმეზე შინაგან საქმეთა სამინისტროში გამოძიება გრძელდება.

სამართალი • 1783061369

საგამოძიებო სამსახურმა საბაჟო გამშვები პუნქტის ცვლის უფროსი ქრთამის აღების ფაქტზე დააკავა

საქართველოს ფინანსთა სამინისტროს საგამოძიებო სამსახურის თანამშრომლებმა, საქართველოს პროკურატურასა და შემოსავლების სამსახურთან კოორდინაციით, გატარებული ოპერატიულ-სამძებრო და საგამოძიებო მოქმედებების შედეგად, დიდი ოდენობით ქრთამის აღების ფაქტზე შემოსავლების სამსახურის საბაჟო დეპარტამენტის საბაჟო გამშვები პუნქტ „წითელი ხიდის“ ცვლის უფროსი დააკავეს. ინფორმაციას საგამოძიებო სამსახური ავრცელებს.გამოძიებით დადგინდა, რომ ბრალდებული, სამსახურებრივი მოვალეობის შესრულებისას, მოქალაქეს დაჰპირდა, რომ ხელს შეუწყობდა სავალდებულო დეკლარირების გარეშე 200 000 აშშ დოლარის შემოტანაში. აღნიშნული მფარველობის სანაცვლოდ, საჯარო მოხელემ ქრთამის სახით, ყოველ ერთეულ შემთხვევაში, 8 000 აშშ დოლარის გადახდა მოითხოვა.საგამოძიებო სამსახურის თანამშრომლებმა ბრალდებული წინასწარ მოთხოვნილი თანხის ნაწილის - 4 000 აშშ დოლარის აღებისთანავე დააკავეს.სასამართლოს განჩინების საფუძველზე ჩატარებული ფარული საგამოძიებო მოქმედებების შედეგად, მოპოვებულია აღნიშნული დანაშაულებრივი ქმედების ამსახველი აუდიო და ვიდეომტკიცებულებები.საქმეზე გამოძიება საქართველოს სისხლის სამართლის კოდექსის 338-ე მუხლის მეორე ნაწილის „ბ“ ქვეპუნქტით მიმდინარეობს, რაც სასჯელის სახით ითვალისწინებს თავისუფლების აღკვეთას 7-დან 11 წლამდე ვადით.ფინანსთა სამინისტროს საგამოძიებო სამსახური მოუწოდებს საჯარო მოხელეებსა და მათთან დანაშაულებრივ გარიგებაში შესვლის სურვილის მქონე პირებს, თავი შეიკავონ მსგავსი უკანონო ქმედებებისგან, ვინაიდან სამართალდამცავი უწყებების რეაგირება ნებისმიერ მსგავს ფაქტზე იქნება მყისიერი და კანონის შესაბამისად მკაცრი

მსოფლიო • 1782991827

გერმანიის პროკურატურა: 2022 წელს რუსეთთან დამაკავშირებელი Nord Stream-ისა და Nord Stream 2-ის გაზსადენების საბოტაჟის უკან უკრაინის ხელისუფლება იდგა

გერმანიის პროკურატურის მიერ გამოქვეყნებული განცხადების მიხედვით, 2022 წელს რუსეთთან დამაკავშირებელი Nord Stream-ისა და Nord Stream 2-ის გაზსადენების საბოტაჟის უკან უკრაინის სახელმწიფო ხელისუფლება იდგა.ამავე განცხადების მიხედვით, უკრაინის მოქალაქე სერგეი კ. და მისი ექვსი თანამზრახველი კიევის ბრძანებით მოქმედებდნენ. პროკურატურის ინფორმაციით, საბოტაჟის დროს ოფიციალურად სერგეი კ. „უკრაინის არმიის ოფიცერი“ იყო, მისი თანამზრახველები კი „სამხედრო პერსონალი“ იყვნენ.„მათ Nord Stream 1-ისა და Nord Stream 2-ის განადგურების ბრძანება მიეცათ ამ მილსადენებით გაზის მიწოდების სრულად შეჩერებისა და რუსეთისთვის ბუნებრივი აირის ვაჭრობიდან მიღებული შემოსავლების სამხედრო მოქმედებების დასაფინანსებლად გამოყენების შესაძლებლობის ჩამორთმევის მიზნით“, – ნათქვამია განცხადებაში.ბრალდებებში აღნიშნულია, რომ მამაკაცს ბრალი ედება სამოქალაქო ენერგეტიკულ ინფრასტრუქტურაზე თავდასხმაში, რაც საერთაშორისო სამართლის მიხედვით ომის დანაშაულს წარმოადგენს, ასევე ასაფეთქებელი ნივთიერებით აფეთქების გამოწვევასა და საინჟინრო ნაგებობის განადგურებაში.„დოიჩე ველეს“ ცნობით, ადრე გავრცელდა ინფორმაცია, რომ ამ საქმეში მთავარი ეჭვმიტანილი, სერგეი კ., ბრალდებებს უარყოფს. იგი იტალიაში 2025 წლის ზაფხულში დააკავეს, მოგვიანებით გერმანიაში გადაიყვანეს და ამჟამად ჰამბურგში წინასწარი პატიმრობის ქვეშ იმყოფება. პირველ ივლისს გერმანიის ფედერალურმა პროკურატურამ მას სამოქალაქო ენერგეტიკულ ინფრასტრუქტურაზე თავდასხმის გამო ბრალი წაუყენა.ცნობისთვის, ბალტიის ზღვაში რუსეთიდან გერმანიაში გამავალი Nord Stream-ისა და Nord Stream 2-ის გაზსადენების ოთხი ხაზიდან სამი 2022 წლის სექტემბრის ბოლოს აფეთქდა. იმ დროს გაზის ტრანსპორტირებას არცერთი მათგანი არ ახორციელებდა. გაზსადენებზე აფეთქებებზე პასუხისმგებლობა არავის აუღია. რუსმა ოფიციალურმა პირებმა მაშინ განაცხადეს, რომ ისინი ეჭვობდნენ საქმეში აშშ-სა და დიდ ბრიტანეთს მონაწილეობას.

სამართალი • 1782984980

პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენა, შენახვის და რეალიზაციის ხელშეწყობის ფაქტებზე 4 პირს ბრალდება წარუდგინა

საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენა, შენახვის და რეალიზაციის ხელშეწყობის ფაქტებზე 4 პირს ბრალდება წარუდგინა.შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულებმა რეალიზაციის ხელშეწყობის მიზნით უკანონოდ შეიძინეს და ინახავდნენ განსაკუთრებით დიდი ოდენობით ნარკოტიკულ საშუალებებს: 5 კილოგრამ „მეფედრონს“’, 2 კილოგრამ ,,ალფა პვპს“, ასევე სითხის სახით 41 ლიტრ ,,ალფა პვპს’’ და 5 ლიტრ „მეფედრონს“. გატარებული ღონისძიებების შედეგად შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა აღნიშნული ნარკოტიკული სშუალებები ამოიღეს. ასევე ოთხივე ბრალდებულის საცხოვრებელი სახლიდან ამოღებულია ნარკოტიკული ნივთიერებების დაფასოებისთვის საჭირო ნივთები.დაკავებულებს ბრალდება საქართველოს სისხლის სამართლის კოდექსის 260-ე მუხლის მე-3 ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო შეძენა-შენახვა), 260 კვარტა მუხლის მეექვსე ნაწილის ,,ა’’ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა) წარედგინათ, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.პროკურატურის შუამდგომლობის საფუძველზე სასამართლომ ბრალდებულებს აღკვეთის ღონისძიების სახით პატიმრობა შეუფარდა.