დაღუპულია 23 წლის ბიჭი - ტრაგედია გონიოში
1752696309
კოლუმბიის უნივერსიტეტის მეილმენის საზოგადოებრივი ჯანმრთელობის სკოლის ახალი კვლევა ეჭვქვეშ აყენებს დიდი ხნის შეხედულებას, რომ ანთება დაბერების უნივერსალური მახასიათებელია.
კვლევის მიხედვით, დაბერებასთან დაკავშირებული მუდმივი, მცირე ანთება, შესაძლოა, სინამდვილეში ინდუსტრიალიზებული ცხოვრების პირობებიდან გამომდინარეობდეს.
გუნდმა შეისწავლა მონაცემები ოთხი განსხვავებული პოპულაციიდან: ორი ინდუსტრიალიზებული საზოგადოებიდან (იტალია) და ორი არაინდუსტრიალიზებული ჯგუფიდან (ციმანე ბოლივიის ამაზონში და ორანგ ასლი მალაიზიის ნახევარკუნძულზე).
მიუხედავად იმისა, რომ ორივე ინდუსტრიულ ჯგუფში ასაკთან დაკავშირებული ანთების მსგავსი მოდელები აღინიშნა, იგივე მოდელი ადგილობრივ მოსახლეობაში არ გამოვლენილა. სამაგიეროდ, ამ ჯგუფებში ანთება ძირითადად ინფექციების ზემოქმედებით იყო განპირობებული და არა თავად დაბერების პროცესით.
ქრონიკული დაავადებების რისკი დაკავშირებულია არამხოლოდ ანთებასთან, არამედ ცხოვრების წესთანაც
"ინდუსტრიულ გარემოში ჩვენ ვხედავთ აშკარა კავშირს ანთებასა და ისეთ დაავადებებს შორის, როგორიცაა თირკმლების ქრონიკული პრობლემები. მეორე მხრივ, მაღალი ინფექციის მაჩვენებლის მქონე პოპულაციებში ანთება უფრო მეტად ასახავს ინფექციური დაავადებების ფაქტორს, ვიდრე თავად დაბერებას", — თქვა კვლევის წამყვანმა ავტორმა ალან კოენმა.
მიუხედავად იმისა, რომ მკვიდრი მოსახლეობა (განსაკუთრებით ციმანე) ავლენდა ანთების მუდმივად მაღალ საბაზისო დონეს, ეს დონეები არ იზრდებოდა ასაკთან ერთად და არ იწვევდა ქრონიკულ დაავადებებს, რომლებიც ხშირად გვხვდება ინდუსტრიულ ქვეყნებში. არაინდუსტრიულ საზოგადოებებში ისეთი დაავადებები, როგორიცაა დიაბეტი, გულის პრობლემები და ალცჰაიმერი, ან იშვიათია, ან პრაქტიკულად არ არსებობს.
ეს ნიშნავს, რომ მაშინაც კი, როდესაც მკვიდრი თემების ახალგაზრდა პირებს ანთება უვლინდებათ, ეს პროცესები ჯანმრთელობისთვის ისეთივე მავნე შედეგებს არ იწვევს.
"ეს დასკვნები ნამდვილად ეჭვქვეშ აყენებს იმ აზრს, რომ ანთება თავისთავად მავნებელია. უფრო სწორად, როგორც ჩანს, ანთება — და შესაძლოა დაბერების სხვა მექანიზმებიც — მნიშვნელოვნად არის დამოკიდებული გარემოებაზე. ერთი მხრივ, ეს რთულია, რადგან არ იქნება უნივერსალური პასუხები სამეცნიერო კითხვებზე. მეორე მხრივ, ეს იმედისმომცემია, რადგან ნიშნავს, რომ ჩვენ შეგვიძლია ჩავერიოთ და შევცვალოთ ყველაფერი", — ამბობს კოენი.
იმუნური მარკერები განსხვავებულ გარემოში განსხვავებულად მოქმედებს
კვლევაში ანთების ნიმუშების შესაფასებლად 19 ციტოკინის პანელი (მცირე იმუნური ცილები) გამოიყენეს. მიუხედავად იმისა, რომ ეს მარკერები იტალიურ და სინგაპურულ მონაცემთა ნაკრებებში დაბერების ხასიათს ემთხვეოდა, ისინი არ გამეორებულა ციმანესა და ორანგ ასლის ტომებში, რომელთა იმუნური სისტემებიც მუდმივი ინფექციებისა და განსხვავებული გარემო ფაქტორების ზემოქმედებით იყო ჩამოყალიბებული.
"ეს შედეგები იმუნურ სისტემებსა და ჩვენს გარემოს შორის შეუსაბამობაზე უთითებს. ანთება შეიძლება არ იყოს დაბერების პირდაპირი პროდუქტი, არამედ ინდუსტრიალიზებულ პირობებზე რეაქციაა", — ამბობენ მკვლევრები.
ავტორებს მიაჩნიათ, რომ ხელახლა უნდა შეფასდეს, თუ როგორ იზომება დაბერება და ანთება სხვადასხვა პოპულაციაში. მათი თქმით, ამას დაბერების შესახებ ჩვენი წარმოდგენების შეცვლა შეუძლია
"ისეთი ფაქტორები, როგორიცაა გარემო და ცხოვრების წესი, შეიძლება გავლენას ახდენდეს იმუნური სისტემის დაბერებაზე. ამ ელემენტების ურთიერთქმედების გაგება ხელს შეუწყობს უფრო ეფექტიანი გლობალური ჯანდაცვის სტრატეგიების შემუშავებას", — თქვა კოენმა.
