1762093459

ძიუდოში საქართველოს 23-წლამდელთა ნაკრები ევროპის ჩემპიონია

მოლდოვის დედაქალაქ კიშინეუში მიმდინარე ევროპის ჩემპიონატზე 23-წლამდე ძიუდოისტთა შორის, შერეულ გუნდურ შეჯიბრებაში საქართველოს ნაკრებმა ფინალში საფრანგეთი 4:3 დაამარცხა და ევროპის ჩემპიონის ტიტული მოიპოვა.ფინალში, 3:3-ზე, კენჭისყრის შემდეგ, გადამწყვეტი შეხვედრის ჩატარება გიორგი ტერაშვილს (73 კგ) მოუწია, რომელმაც მეტოქე იპონით დაამარცხა და საქართველოს 23-წლამდელთა ნაკრებს ოქროს მედლები მოუტანა.საქართველოს ნაკრებმა ევროპის ჩემპოოიონატზე შემდეგი შემადგენლობით იასპარეზა: ნინო ლოლაძე (57 კგ), გიორგი ტერაშვილი (73 კგ), ნინო წიკლაური (70 კგ), გიორგი ჯაბნიაშვილი (90 კგ), ლიზი ქვარცხაცა (+70 კგ) და შალვა გურეშიძე (+90 კგ)   

1762086650

თორნიკე შენგელია ევროლიგის მერვე ტურის საუკეთესო მოთამაშე გახდა

თორნიკე შენგელია, რომელიც „ბარსელონაში“ თამაშობს, ევროლიგის მერვე ტურის საუკეთესო კალათბურთელად აღიარეს. ბელგრადის „პარტიზანის“ წინააღმდეგ მატჩში საქართველოს ნაკრების კაპიტანმა 30 წუთი ითამაშა, რა დროშიც 24 ქულა, 5 მოხსნა, 5 პასი და 4 ჩაჭრა მიითვალა.ქართველმა კალათბურთელმა 5-დან 4 ორქულიანი, 3-დან 2 სამქულიანი და 12-დან 10 საჯარიმო ჩააგდო. შედეგად, მისი სარგებლიანობის კოეფიციენტი 42 იყო, რაც ტურში საუკეთესო მაჩვენებელი გამოდგა. შენგელია ევროლიგის ტურის MVP კარიერაში მეცხრედ დაასახელეს.

1762080912

საქართველოს ხელბურთელთა ნაკრებმა „კარპატის თასი“ ისტორიაში პირველად მოიგო

ისტორიაში პირველად, საქართველოს ხელბურთელთა ნაკრები „კარპატის თასის“ გამარჯვებულია. ტიტე კალანდაძის გუნდმა მეორე შეხვედრა მასპინძელ რუმინეთს ანგარიშით 30:27 მოუგო.მატჩის საუკეთესო მოთამაშე ნიკოლოზ კალანდაძე გახდა, რომელმაც 11 გოლი და 6 შედეგიანი გადაცემა დააგროვა. ტურნირის ჩემპიონობა ეროვნულმა ნაკრებმა ბოლო ტურამდე იზეიმა, რადგან უკრაინამ თავისი მატჩი ვერ მოიგო. ბოლო შეხვედრას ქართველი ხელბურთელები სწორედ უკრაინასთან ჩაატარებენ.

1762075285

ქართველმა მოჭადრაკეებმა სენიორებს შორის მსოფლიოს ჩემპიონატზე სამი მედალი მოიპოვეს

იტალიის ქალაქ გალიპოლიში სენიორებს შორის დასრულდა მსოფლიო ჩემპიონატი ჭადრაკში, სადაც საქართველომ 3 მედალი მოიპოვა.50+ ასაკობრივ კატეგორიაში მიხეილ კეკელიძემ 11-დან 9 ქულით ვერცხლის მედალი მოიპოვა. 65+ ასაკობრივ კატეგორიაში 11-დან 8.5 ქულით ვიცე-ჩემპიონი გახდა ზურაბ სტურუა, ხოლო ქალებს შორის ნონა გაფრინდაშვილმა 11-დან 7.5 ქულა დააგროვა და ბრინჯაოს მედალი დაისაკუთრა.მსოფლიო პირველობაზე, რომელიც შვეიცარიული სისტემით ჩატარდა, 64 ქვეყნის 458 მონაწილე გამოდიოდა.

1762071150

ხვიჩა კვარაცხელიამ „ნიცასთან“ საგოლე გადაცემა შეასრულა

 საფრანგეთის ლიგა 1-ის მე-11 ტურში „პარი სენ-ჟერმენმა“ „ნიცას“ დრამატულ ბრძოლაში 1:0 აჯობა. გამარჯვების მომტან გოლში ხვიჩა კვარაცხელიაც მონაწილეობდა. ქართველმა ფეხბურთელმა მსაჯის მიერ კომპენსირებულ ბოლო, მეოთხე წუთზე გონსალო რამოშს შესანიშნავი პასი გაუკეთა და მანაც თავით გაიტანა. გოლის შემდეგ თამაში არც განახლებულა და პარიზის გუნდმა მორიგი 3 ქულა მოიპოვა.ხვიჩა კვარაცხელიას ლიგა 1-ის მიმდინარე სეზონში 9 მატჩში ორი საგოლე პასი დაუგროვდა. „პარი სენ-ჟერმენი“ 24 ქულით ლიდერია და მომდევნო ტურში 9 ნოემბერს, „ლიონს“ ესტუმრება, თუმცა მანამდე 4 ნოემბერს, ჩემპიონთა ლიგაზე „ბაიერნს“ უმასპინძლებს.

1762019457

ძალოსანი ლევან ოჩიგავა ევროპის ჩემპიონია

ალბანეთში 20-წლამდელებს შორის ძალოსანთა ევროპის ჩემპიონატი მიმდინარეობს. ტურნირზე ქართველმა ძალოსანმა ატაცში, აკვრასა და ორჭიდის ჯამში ოქროს მედლები მოიპოვა.ლევან ოჩგავამ (88 კგ) ატაცში 154 კილოგრამი დასძლია, აკვრაში 191 კილოგრამი დააფიქსირა, ორჭიდის ჯამში კი 345 კილოგრამი დააგროვა. ლევან ოჩიგავამ ატაცში, აკვრასა და ორჭიდის ჯამში ევროპის რეკორდები დაამყარა.მიმდინარე ევროპის ჩემპიონატზე ძალოსანმა გიგა ოდიკაძემ (60 კგ) ორჭიდის ჯამში 266 კილოგრამი დააგროვა და ვერცხლის მედალი მოიპოვა. ატაცში სპორტსმენმა 121 კილოგრამი დაძლია, ოქროს მედალი დაისაკუთრა და ევროპის რეკორდიც დაამყარა, აკვრაში კი 145 კილოგრამი დააფიქსირა და ბრინჯაოს პრიზიორი გახდა.ქართველი ძალოსნები ევროპის ჩემპიონატზე სპორტის სამინისტროს მხარდაჭერით ასპარეზობენ.ინფორმაციას სპორტის სამინისტრო ავრცელებს.

1762013041

ძიუდოისტი გიორგი ჯაბნიაშვილი 23-წლამდელთა შორის ევროპის ჩემპიონია

მოლდოვის დედაქალაქ კიშინიოვში 23-წლამდელთა შორის ევროპის ჩემპიონატი მიმდინარეობს. ქართველი ძიუდოისტი გიორგი ჯაბნიაშვილი (-90 კგ) ტურნირის ჩემპიონი გახდა. მიმდინარე ტურნირზე საქართველოს ნაკრებისთვის ეს პირველი ოქროს მედალია.ქართველმა სპორტსმენმა მერვედფინალში ესპანელ აარონ სანტამარიას, მეოთხედფინალურ შეხვედრაში პორტუგალიელ პედრუ ლიმას, ხოლო ნახევარფინალში აზერბაიჯანელ ასლან კოცოევს სძლია. ფინალურ შეხვედრაში კი გიორგი ჯაბნიაშვილმა მოლდოველი მიხაილ ლატისევი დაამარცხა.საქართველოს ნაკრებისთვის 2025 წლის ძიუდოს 23-წლამდელთა შორის ევროპის ჩემპიონატზე ეს მეორე მედალია. მანამდე, კოტე კაპანაძე (-81 კგ) ჩემპიონატის ბრინჯაოს პრიზიორი გახდა.ქართველი ძიუდოისტები ევროპის ჩემპიონატზე სპორტის სამინისტროს მხარდაჭერით იმყოფებიან.ინფორმაციას სპორტის სამინისტრო ავრცელებს.

1761926322

მათე გოგობერიშვილი 23-წლამდელთა შორის ევროპის ვიცე-ჩემპიონია

მოლდოვის დედაქალაქ კიშინიოვში ძიუდოს ევროპის 23-წლამდელთა ჩემპიონატი მიმდინარეობს, რომელზეც მათე გოგობერიშვილმა (-60 კგ) ვერცხლის მედალი მოიპოვა.ქართველმა ძიუდოისტმა ფინალამდე თურქი იუნუს ემრე უსუნბოგა, ისრაელის წარმომადგენელი იონათამ ვექსლერი და პოლონელი კსავერი იგნასიაკი დაამარცხა. ოქროს მედლისათვის ორთაბრძოლა მათე გოგობერიშვილმა სომეხ ვაჰე აღასიანთან დათმო.ქართველი ძიუდოისტები ჩემპიონატზე სპორტის სამინისტროს მხარდაჭერით იმყოფებიან.ინფორმაციას სპორტის სამინისტრო ავრცელებს.

1761848379

„ძვირფასო მეგობრებო, გავრცელდა ინფორმაცია ჩემი გაჩემპიონების შესახებ, რაც სიმართლეს არ შეესაბამება - წინ კიდევ ორი ტურია“ - ნონა გაფრინდაშვილი

„ძვირფასო მეგობრებო, როგორც შევიტყვე, გავრცელდა ინფორმაცია ჩემი გაჩემპიონების შესახებ, რაც სიმართლეს არ შეესაბამება.დღეს მე-9 ტური ყაიმით დავასრულე - წინ კიდევ ორი ტურია. მინდა მადლობა ვუთხრა ყველა გულშემატკივარს მხარდაჭერისთვის!“ - წერს მოჭადრაკე ნონა გაფრინდაშვილი სოციალურ ქსელში.ცნობისთვის, 84 წლის ჭადრაკის დედოფალი იტალიაში იმყოფება და სენიორთა შორის მსოფლიო ჩემპიონობისთვის იბრძვის.

1761593167

მერაბ სულეიმანიშვილი ჭიდაობაში 23-წლამდელთა შორის მსოფლიოს ვიცე-ჩემპიონია

სერბეთის ქალაქ ნოვი-სადში​ 23-წლამდელთა შორის მსოფლიოს ჩემპიონატი გაიმართა. თავისუფალი სტილით მოჭიდავე მერაბ სულეიმანიშვილმა (97 კგ) ფინალი იაპონელ არაშ იოშიდასთან დათმო და ვიცე-ჩემპიონი გახდა.ფინალურ შეხვედრამდე მან ინდოელი, უკრაინელი და ჭიდაობის საერთაშორისო ფედერაციის სახელით მოასპარეზე სპორტსმენები დაამარცხა.ქართველი მოჭიდავეები ტურნირზე საქართველოს სპორტის სამინისტროს მხარდაჭერით იმყოფებოდნენ.ინფორმაციას სპორტის სამინისტრო ავრცელებს.

1761416040

მოკრივე გიორგი ახვლედიანი ევროპის ჩემპიონია

მონტენეგროს ქალაქ ბუდვაში კრივის 15-წლამდელთა ევროპის ჩემპიონატი გრძელდება. მოკრივე გიორგი ახვლედიანმა (55 კგ) ევროპის ჩემპიონობა იზეიმა. ქართველმა სპორტსმენმა ფინალში თურქი იაღიზ კიმაზი დაამარცხა.ფინალამდე გიორგი ახვლედიანმა აზერბაიჯანელი ისმაილ ასლანლის, იტალიელ მატეო მაჩელის, უკრაინელი კირილო ჩუმაკოვსა და ირლანდიელ პატრიკ ჰარიქენის სძლია.ამ ეტაპზე საქართველოს ნაკრების ანგარიშზე ექვსი მედალია. ევროპის ჩემპიონობა იზეიმა ელენე ქარჩავამ (48კგ), ვერცხლი ლიზა ლობჟანიძემ (66 კგ) მოიპოვა, ბრინჯაოს პრიზიორები კი თორნიკე სიმონიშვილი (40 კგ), საბა კერძევაძე (44 კგ) და ჯონი ხაბურზანია (46 კგ) გახდნენ.ახალგაზრდა მოკრივეები ევროპის ჩემპიონატზე საქართველოს სპორტის სამინისტროს მხარდაჭერით იმყოფებიან.ინფორმაციას სპორტის სამინისტრო ავრცელებს.

1761403587

მოკრივე ლიზა ლობჟანიძე ევროპის ვიცე-ჩემპიონია

მონტენეგროს ქალაქ ბუდვაში კრივის 15-წლამდელთა ევროპის ჩემპიონატი გრძელდება. მოკრივე ლიზა ლობჟანიძემ (66 კგ) ფინალი ინგლისელ რუბი-ჯო დოს სანტოსთან დათმო და ვერცხლის მედალი მოიპოვა.ქართველმა მოკრივემ მეოთხედფინალში ისრაელის წარმომადგენელ ალექსანდრა კერდოლს აჯობა, ნახევარფინალში კი პოლონელ ნადია მუჩას სძლია.ამ ეტაპზე საქართველოს ნაკრების ანგარიშზე ხუთი მედალია. ევროპის ჩემპიონობა იზეიმა ელენე ქარჩავამ (48კგ), ბრინჯაოს პრიზიორები კი თორნიკე სიმონიშვილი (40 კგ), საბა კერძევაძე (44 კგ) და ჯონი ხაბურზანია (46 კგ) გახდნენ.ახალგაზრდა მოკრივეები ევროპის ჩემპიონატზე საქართველოს სპორტის სამინისტროს მხარდაჭერით იმყოფებიან.ინფორმაციას სპორტის სამინისტრო ავრცელებს.