რა ემართება თქვენს არტერიულ წნევას ყავის დალევის შემდეგ

ყავა ძირითადად მისი მასტიმულირებელი ეფექტის გამოა პოპულარული, რაც ადამიანს სიფხიზლის შეგრძნებაში ეხმარება. თუმცა ეს ასევე არის მიზეზი, რის გამოც ყავას შეუძლია არტერიული წნევის მატება.

„კოფეინს შეუძლია დროებით გაზარდოს არტერიული წნევა, ჰიპერტენზიის არმქონე ადამიანებშიც კი. ეს განპირობებულია მისი მასტიმულირებელი ზემოქმედებით ცენტრალურ ნერვულ სისტემაზე, რაც იწვევს ადრენალინის გამოყოფას და ბლოკავს ადენოზინს - ქიმიურ ნივთიერებას, რომელიც ხელს უწყობს სისხლძარღვების მოდუნებას“, - განმარტავს დიეტოლოგი  კირან კემპბელი.

როდესაც ადენოზინი დაბლოკილია, სისხლძარღვები ვიწროვდება, რამაც შეიძლება გამოიწვიოს მაღალი არტერიული წნევა. კვლევები აჩვენებს, რომ ყავას მართლაც შეუძლია მოკლევადიან პერსპექტივაში გაზარდოს არტერიული წნევა და გულისცემა . თუმცა, ის არ იწვევს მაღალ არტერიულ წნევას გრძელვადიან პერსპექტივაში.

„დროთა განმავლობაში, ადამიანების უმეტესობა კოფეინის მიმართ ტოლერანტობას ავითარებს. კოფეინის ზომიერი მოხმარება ჯანმრთელი ზრდასრულების უმეტესობაში არტერიული წნევის მუდმივ მატებას არ იწვევს“, - თქვა კარდიოლოგმა ედო პაზმა .

ადენოზინი არის მოლეკულა, რომელიც ზრდის ძილიანობას. კოფეინი ბლოკავს ადენოზინის რეცეპტორებს, ამიტომ ის გეხმარებათ უფრო ფხიზლად იგრძნოთ თავი. თუმცა, ადენოზინი ასევე მოქმედებს გულ-სისხლძარღვთა ჯანმრთელობაზე.

ყავა შეიცავს მრავალ ანტიოქსიდანტს, მათ შორის პოლიფენოლებს. ეს ანტიოქსიდანტები ხელს უწყობენ სისხლძარღვების გაფართოებას, რაც დროთა განმავლობაში ამცირებს არტერიულ წნევას. სინამდვილეში, ზოგიერთმა კვლევამ აჩვენა, რომ ყავის ანტიოქსიდანტური სარგებელი შეიძლება აჭარბებდეს კოფეინის მიერ გამოწვეულ არტერიული წნევის მატების ეფექტს.

კვლევამ აჩვენა, რომ ჰიპერტენზიის მქონე პაციენტებს, რომლებიც დღეში ნახევარიდან ორნახევარ ჭიქამდე ყავას სვამდნენ, სისხლძარღვების უკეთესი ფუნქცია ჰქონდათ, ვიდრე მათ, ვინც საერთოდ არ სვამდა ყავას.