თავდაცვისა და უშიშოების კომიტეტის სხდომაზე „დაზვერვის სამსახურის შესახებ“ კანონში შესატან ცვლილებებზე მეორე მოსმენით იმსჯელებენ

 პარლამენტში თავდაცვისა და უშიშოების კომიტეტის სხდომა გაიმართება, სადაც დეპუტატები „დაზვერვის სამსახურის შესახებ“ კანონში შესატან ცვლილებებზე მეორე მოსმენით იმსჯელებენ.

საკანონმდებლო ცვლილებების პროექტით, დაზვერვის სამსახური პრემიერ-მინისტრის დაქვემდებარებიდან სახელმწიფო უსაფრთხოების სამსახურის მმართველობის სფეროში გადადის. ცვლილებების მიხედვით, დაზვერვის სამსახური სახელმწიფო უსაფრთხოების სამსახურის საქვეუწყებო დაწესებულებად – ეროვნულ სადაზვერვო სააგენტოდ ჩამოყალიბდება.

აღნიშნული ინიციატივით, ახლებურად წესრიგდება სააგენტოს საქმიანობასა და უფლებამოსილებებთან, სააგენტოს შემადგენლობასთან, ორგანიზებასა და სტრუქტურასთან, სააგენტოს მოსამსახურის სამსახურებრივ საქმიანობაში ჩარევის დაუშვებლობასთან, მის სამართლებრივი დაცვის გარანტიებსა და სააგენტოს დაფინანსებასთან დაკავშირებული საკითხები.

მმართველი გუნდის შეფასებით, ცვლილებების მიზანია სამსახურების უფლებამოსილებების კიდევ უფრო ეფექტიანად განხორციელების უზრუნველყოფა და ეროვნული უსაფრთხოების სისტემის გამართული ფუნქციონირება.