NATO-ს მადრიდის სამიტი - რა შეფასებები მოჰყვა კომუნიკეში საქართველოსთან დაკავშირებით გაკეთებულ ჩანაწერს ქართულ პოლიტიკურ სპექტრში

NATO-ს მადრიდის სამიტზე საქართველოსთან დაკავშირებით მიღებულ გადაწყვეტილებებს თბილისში აფასებენ.

ოპოზიციის ნაწილი აქცენტს საქართველოსთვის ნატოს „ღია კარის" პრინციპზე ამახვილებს, ნაწილი კი სამიტზე მიღებულ კომუნიკეში ჩანაწერს, სადაც არ არის ყურადღება გამახვილებული ქვეყნის ტერიტორიული მთლიანობის მხარდაჭერაზე, ხელისუფლების უმოქმედობად თვლის.

საქართველოს, როგორც პრიორიტეტული მოკავშირის აღიარებასა და წარმატებულ პერსპექტივაზე საუბრობენ მმართველ გუნდში.

„ეს ნიშნავს იმას, რომ მადრიდის სამიტი საქართველოსთვის სრულდება ხელშესახები და ძალიან მნიშვნელოვანი შედეგებით. სამიტმა თვისობრივად სრულიად ახალ ეტაპზე გადაიყვანა ნატო საქართველოს ურთიერთობა," - აცხადებს პარლამენტის თავდაცვისა და უშიშროების კომიტეტის თავმჯდომარე ირაკლი ბერაია.