„უოლ სთრით ჯორნალი“ - ირანმა განაცხადა, რომ ჰორმუზის სრუტეში დღეში მხოლოდ 10 გემს გაატარებს

ირანმა განაცხადა, რომ ჰორმუზის სრუტეში დღეში მხოლოდ 10 გემს გაატარებს.

როგორც „უოლ სთრით ჯორნალი“ წერს, ამის შესახებ ირანმა აშშ-თან მოლაპარაკებებში ჩართულ შუამავლებს აცნობა.

გამოცემის ცნობით, ირანის სამხედრო-საზღვაო ძალებმა გააფრთხილეს ის გემები, რომლებიც ამ რაიონში გადაადგილებას ელოდებიან, რომ სრუტეს გაივლიან მხოლოდ მაშინ, როდესაც მიიღებენ თეირანიდან შესაბამის ნებართვას.

„რომელიმე გემი თუ ნებართვის გარეშე შეეცდება სრუტის გავლას, განადგურდება“, – განაცხადეს ირანის სამხედრო-საზღვაო ძალების წარმომადგენლებმა.

ამჟამად ჰორმუზის სრუტეში გავლას 400-ზე მეტი ტანკერი ელოდება. მანამდე, „ფეინენშალ თაიმსი“ წერდა, რომ ირანი ჰორმუზის სრუტეში გადაადგილების სანაცვლოდ გემებისგან, რომლებიც ნავთობს გადაიტანენ, მოითხოვს თანხას – თითო ბარელ ნავთობზე ერთი დოლარი. გემებს გადახდას სთავაზობენ კრიპტოვალუტით.