საქართველოს 18-წლამდელთა ნაკრებმა ინგლისის ნაკრები დაამარცხა

საქართველოს 18-წლამდე მორაგბეთა ნაკრებმა სამხრეთ აფრიკაში მიმდინარე საერთაშორისო სერიის პირველი მატჩი ინგლისელ თანატოლებთან ჩაატარა და მეტოქე 35:31 დაამარცხა.

პირველი ტაიმი უმცროსმა „ბორჯღალოსნებმა“ 13:21 წააგეს. მეორე ნახევარი ქართველმა მორაგბეებმა უფრო აქტიურად დაიწყეს და მე-60 წუთისთვის 32:31 დაწინაურდნენ. რამდენიმე წუთში არბიტრმა ინგლისელების მორაგბე 10 წუთით გააძევა, ქართველმა მორაგბეებმა რიცხვობრივი უპირატესობით ისარგებლეს, მატჩის ბოლო წუთზე ჯარიმა გაიტანეს და საბოლოოდ 35:31 მოიგეს.

აღნიშნულ ტურნეში საქართველო 12 აგვისტოს სამხრეთ აფრიკის A ნაკრებს ეთამაშება, 16 აგვისტოს კი – ირლანდიას.