საქართველოს 16-წლამდელთა წყალბურთის ნაკრები ევროპის ჩემპიონატის მომდევნო ეტაპზე იასპარეზებს

სტამბოლში 16-წლამდელებს შორის ევროპის ჩემპიონატი მიმდინარეობს. ქართველმა წყალბურთელებმა სამი შეხვედრიდან ორი მოიგეს - ჯგუფში მეორე ადგილი დაიკავეს და ევროპის ჩემპიონატის მომდევნო ეტაპზე გადავიდნენ.

პირველ შეხვედრაში ახალგაზრდულმა ნაკრებმა მალტა ანგარიშით 11:8 დაამარცხა, მეორე შეხვედრაში მოლდოვა ანგარიშით 17:11, ხოლო ნიდერლანდებთან მატჩი 8:16 დათმო.

ტურნირზე საქართველოს ახალგაზრდული ნაკრები ისტორიაში პირველად ასპარეზობს.

ახალგაზრდა წყალბურთელები კონტინენტის პირველობაზე საქართველოს სპორტის სამინისტროს მხარდაჭერით იმყოფებიან.

ინფორმაციას სპორტის სამინისტრო ავრცელებს.