ირაკლი კობახიძე: ჩვენი მხრიდან ვერც პირდაპირი და ვერც ირიბი ე.წ. დამოუკიდებლობის აღიარება ვერ მოხდება, ნებისმიერი მოწოდება, რომელიც ამისკენ მიანიშნებს, კატეგორიულად მიუღებელია

ჩვენი მხრიდან ვერც პირდაპირი, ვერც ირიბი ე.წ. დამოუკიდებლობის აღიარება ვერ მოხდება, ნებისმიერი მოწოდება, რომელიც ამისკენ მიანიშნებს, ჩვენთვის კატეგორიულად მიუღებელია, – ამის შესახებ პრემიერ-მინისტრმა, ირაკლი კობახიძემ ჟურნალისტის კითხვის პასუხად განაცხადა, რომელიც თავდაუსხმელობის შეთანხმებასთან დაკავშირებით ალან გაგლოევის მოწოდებას შეეხებოდა.

პრემიერ-მინისტრის განცხადებით, ტერიტორიული მთლიანობის აღდგენისკენ ერთადერთი გზა არის მშვიდობიანი გზა, ვერავითარ სხვა შეთანხმებასა და დოკუმენტზე საუბარი ვერ იქნება.

„ეს მოწოდება არ არის ჩვენთვის სერიოზული, რაც შეეხება თავდაუსხმელობას, ჩვენ ვაცხადებთ ერთადერთ რამეს – ერთადერთი გზა ტერიტორიული მთლიანობის აღდგენისკენ არის მშვიდობიანი გზა და, რა თქმა უნდა, ვერავითარ სხვა შეთანხმებასა და დოკუმენტზე ვერ იქნება საუბარი. იქ ზახაროვა რაღაცას ამბობს, იქ კუბილიუსი რაღაცას ამბობს, თქვენ ნუ დასდევთ მათ განცხადებებს. კუბილიუსი პირდაპირ ემტერება ჩვენს ეროვნულ ინტერესებს, მთელი ამ წლების განმავლობაში ქართველი ხალხის მტრობის მეტი არაფერი უკეთებია. ჩვენთვის ასეთი მოწოდებები სრულიად მიუღებელია. ჩვენი მხრიდან ვერც პირდაპირი, ვერც ირიბი აღიარება ე.წ. დამოუკიდებლობისა ვერ მოხდება, შესაბამისად, ნებისმიერი მოწოდება, რომელიც ამისკენ მიანიშნებს ჩვენთვის კატეგორიულად მიუღებელია,“- განაცხადა პრემიერ-მინისტრმა.