დიპლომატიური კორპუსის თუ ჩვენი გარე მეგობრების დამოკიდებულება აბსოლუტურად არასწორია და ეს არის ქვეყნის შიდა საქმეებში ჩარევის მცდელობა, თავიანთ ქვეყნებს მიხედონ და თანაბარსწორად გველაპარაკოს ყველა - მამუკა მდინარაძე

რაც შეეხება დიპლომატიური კორპუსის თუ ჩვენი გარე მეგობრების დამოკიდებულებას, აბსოლუტურად არასწორია და ეს არის ქვეყნის შიდა საქმეებში ჩარევის მცდელობა - ოღონდ, მცდელობა, კიდევ კარგი, არ გამოსდით, - განაცხადა „ქართული ოცნების" აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ.

როგორც მან აღნიშნა ხელისუფლებამ შეძლო, რომ საქართველო იმგვარად დამოუკიდებელი ყოფილიყო, გარე ჩარევებს გავლენა ვერ მოეხდინა შიდა პოლიტიკაზე.

მდინარაძემ ასევე მოუწოდა გარე აქტორებს, რომ საკუთარ ქვეყნებს მიხედონ და საქართველოს თანასწორად ესაუბრონ, ვინაიდან, ამ ქვეყნისა და ხალხის შესახებ გადაწყვეტილებები, მხოლოდ საქართველოში მიიღება.

„ჩვენ შევძელით, რომ ჩვენი სამშობლო, ჩვენი ქვეყანა ყოფილიყო იმგვარად დამოუკიდებელი, რომ ამ ჩარევებს რაიმე გავლენა შიდა საქმეებზე, შიდა პოლიტიკაზე ვერ მოეხდინა. თავიან ქვეყნებს მიხედონ და თანაბარსწორად გველაპარაკოს ყველა. ბედნიერებაა, როგორც იქნა გავბედეთ, რომ ასე ვლაპარაკობთ და ამაში ლომის წილი მიუძღვის ყველა იმ ადამიანს, რომელმაც არამხოლოდ მხარი დაუჭირა და დღესაც მხარს უჭერს "ქართულ ოცნებას", არამედ მხარს უჭერს საკუთარი ქვეყნის დამოუკიდებლობას და ამაყად საუბარს, რომ საქართველოსა და ქართველი ხალხის შესახებ მხოლოდ საქართველოში მიიღება გადაწყვეტილებები," - აღნიშნა მამუკა მდინარაძემ.