Kyiv Post: ტრამპის ადმინისტრაცია აპირებს, უკრაინისთვის 50 მილიონი დოლარის შეიარაღების მიყიდვა დაამტკიცოს

გამოცემა Kyiv Post დიპლომატიურ წყაროებზე დაყრდნობით წერს, რომ პრეზიდენტ დონალდ ტრამპის ადმინისტრაციამ 30 აპრილს კონგრესს აცნობა, რომ უკრაინისთვის პირდაპირი კომერციული გაყიდვებით (DCS) $50 მილიონის ან მეტი ღირებულების თავდაცვასთან დაკავშირებული პროდუქციის ექსპორტის დამტკიცებას აპირებენ.

გამოცემის ექსკლუზიური ინფორმაციით, აღნიშნული ნებართვა პირველია მას შემდეგ, რაც 100-ზე მეტი დღის წინ დონალდ ტრამპი თეთრ სახლში დაბრუნდა.

Kyiv Post-ის მიხედვით, კონგრესმა უკრაინისთვის ბოლო სამხედრო დახმარების პაკეტში $1 მილიარდის ღირებულების DCS-თან დაკავშირებული იარაღის გაყიდვები დაამტკიცა. ხოლო პრეზიდენტ ჯო ბაიდენის ადმინისტრაციის დროს აღნიშნული პროგრამის მეშვეობით აშშ უკრაინას სასწრაფოდ საჭირო შეიარაღებას აწვდიდა.

"ყველა პირდაპირი კომერციული გაყიდვა (DCS) ჩუმად ხდება; მათ საჯაროდ არ აანონსებენ, როგორც ეს საგარეო სამხედრო გაყიდვების შემთხვევაშია". - აღნიშნა Tochnyi-ს ანალიტიკოსმა გამოცემასთან საუბრისას.

"ახალი ამბავი ის არის, რომ ფაქტობრივად ეს [ამერიკული იარაღის მიყიდვა] გრძელდება, მიუხედავად ყველას პროგნოზისა, რომ ტრამპი უკრაინას სრულად შეუწყვეტდა დახმარებას". - დაამატა მან.

Kyiv Post-ის ინფორმაციით, $50-მილიონიანი გაყიდვის ლიცენზიაზე შეტყობინება ტრამპის ადმინისტრაციამ კონგრესს იარაღის ექსპორტის მაკონტროლებელი აქტის მეშვეობით გაუგზავნა. აღნიშნული კანონი აშშ-ს პრეზიდენტებს უფლებამოსილებას ანიჭებს, აკონტროლონ თავდაცვითი მასალებისა და მომსახურების იმპორტი და ექსპორტი.

ცნობისთვის, 30 აპრილს ვაშინგტონში აშშ-სა და უკრაინას შორის გაფორმდა შეთანხმება, რომელიც აშშ-უკრაინის რეკონსტრუქციის საინვესტიციო ფონდის შექმნას ისახავს მიზნად.