რატომ დააკავეს ბლოგერი, რომელსაც შვიდივე კონტინენტის შემოვლა სურდა

ჩილეს ხელისუფლებამ დააკავა 19 წლის ბლოგერი ითან გო, რომელიც შვიდივე კონტინენტის დამოუკიდებლად შემოვლას ცდილობდა. ის ნებართვის გარეშე ანტარქტიდის სანაპიროსთან მდებარე კუნძულზე დაეშვა, იტყობინება The New York Times.

ამჟამად ითან გო ანტარქტიდის სანაპიროდან დაახლოებით 120 კილომეტრში, კინგ ჯორჯის კუნძულზე, ჩილეს ბაზაზე იმყოფება, სანამ მისი საქმე გამოძიების პროცესშია. მას კუნძულის დატოვების უფლება მიეცა იმ პირობით, რომ ჩილეში დარჩებოდა საქმის გახსნამდე.

გამოცემამ ხაზგასმით აღნიშნა, რომ ბლოგერმა მსოფლიოს გარშემო თავისი მოგზაურობა დოკუმენტურად აღწერა და ვიდეოები სოციალურ ქსელში გამოაქვეყნა. ეს ვიდეოები მილიონობით მომხმარებელმა ნახა.

ითან გომ პილოტის ლიცენზია 17 წლის ასაკში მიიღო. მან თქვა, რომ სურდა ყოფილიყო პირველი ადამიანი, ვინც პატარა თვითმფრინავით მარტო გაფრინდებოდა შვიდივე კონტინენტზე. მას ასევე სურდა 1 მილიონი დოლარის შეგროვება კიბოს კვლევისთვის.

გამოცემის ცნობით, ერთადერთი კონტინენტი, სადაც ითან გო არ ყოფილა, ანტარქტიდა იყო. პროკურორების თქმით, ის ჩილეს სამხრეთ კიდესთან ახლოს მდებარე ქალაქიდან აფრინდა. ფრენის გეგმის მიხედვით კი, ის ქალაქის თავზე გადაფრენას და პუნტა-არენასში დაშვებას აპირებდა. ბლოგერმა არ აცნობა საავიაციო ხელისუფლებას, რომ აპირებდა თავისი Cessna 182Q-ით სამხრეთ ოკეანეში გადაფრენას.

პროკურორების თქმით, ბლოგერმა წარადგინა „ფრენის გეგმის შესახებ ცრუ ინფორმაცია“. როდესაც მან დაგეგმილი კურსიდან გადაუხვია, საავიაციო ხელისუფლებამ მისი Cessna „დაკარგულად“ გამოაცხადა. „ეს შეიძლებოდა ტრაგედიით დასრულებულიყო“, - განუცხადა ჟურნალისტებს პროკურორმა.

ითან გომ განაცხადა, რომ ამინდის პირობების და საკუთარი უსაფრთხოების მიზნით, იძულებული გახდა ჩილეს კინგ ჯორჯის კუნძულზე მდებარე აეროდრომზე დაშვებულიყო.

„მე ჩემს ადვოკატებს დავავალე, გამოხატონ სრული მზადყოფნა, ითანამშრომლონ გარემოებების დროულად გარკვევაში. არ მაქვს ჩილეს კანონმდებლობის დარღვევის განზრახვა და იმედი მაქვს, მალე გავაგრძელებ ჩემს საქმიანობას“, - თქვა ბლოგერმა.