პროკურატურის თანამშრომელთა პროფესიულ დღესთან დაკავშირებით წარმატებული თანამშრომლები დაჯილდოვდნენ

პროკურატურის თანამშრომელთა პროფესიულ დღესთან დაკავშირებით, გენერალურმა პროკურორმა გიორგი გაბიტაშვილმა მოადგილეებთან ერთად წარმატებული თანამშრომლები სამსახურებრივი მოვალეობის სანიმუშოდ და კეთილსინდისიერად შესრულებისთვის მადლობის სიგელებით, სახელმწიფო სპეციალური წოდების ვადამდე მინიჭებით და საპატიო თანამშრომლის წოდებით დააჯილდოვეს. ინფროამციას საქართველოს პროკურატურა ავრცელებს.

გენერალურმა პროკურორმა გიორგი გაბიტაშვილმა კოლეგებს პროკურატურის თანამშრომელთა პროფესიული დღე მიულოცა და მადლობა გადაუხადა თავდაუზოგავი შრომისთვის, პროფესიონალიზმიზთვის და ერთგულებისათვის.

„თითოეული თქვენგანი ხართ ჩვენი ქვეყნის სამართლიანობისა და კანონის უზენაესობის საყრდენი, თქვენს ერთგულებასა და თავდადებაზე დგას დღეს ჩვენი საზოგადოების სიმშვიდე და უსაფრთხოება. თქვენი ყოველდღიური შრომა, პროფესიონალიზმი, სიმტკიცე და პრინციპულობა უზრუნველყოფს, რომ „სამართალი“ იყოს არა ლიტონი სიტყვა, არამედ უმაღლესი ღირებულება, რომელიც იცავს თითოეული მოქალაქის უფლებებს,“-განაცხადა გიორგი გაბიტაშვილმა.

გენერალური პროკურორის მუდმივმოქმედი სათათბირო ორგანოს – კარიერის მართვის, ეთიკისა და წახალისების საბჭოს რეკომენდაციის საფუძველზე, სამსახურებრივი მოვალეობის სანიმუშოდ შესრულებისთვის მადლობა გამოეცხადა პროკურატურის 118 თანამშრომელს, სახელმწიფო სპეციალური წოდება ვადამდე მიენიჭა15-თანამშრომელს. ასევე პროკურატურის საპატიო თანამშრომლის წოდება მიენიჭა 3 თანამშრომელს და დაჯილდოვდნენ შესაბამისი სამკერდე ნიშნით: რევაზ ბაღაშვილი - საქართველოს გენერალური პროკურატურის საგამოძიებო ნაწილის უფროსი, ზაზა მეტონიძე - აჭარის ავტონომიური რესპუბლიკის პროკურორი, იამზე ვაშალომიძე - ქვემო ქართლის საოლქო პროკურატურის საქმისწარმოების განყოფილების უფროსი.

პროკურატურის თანამშრომელთა პროფესიული დღე საქართველოში 1999 წლის 30 მაისიდან აღინიშნება.