გრენლანდია დაპყრობის ობიექტი არ არის და არც ანტარქტიკა იყიდება - ემანუელ მაკრონი

გრენლანდია დაპყრობის ობიექტი არ არის და არც ანტარქტიკა არ იყიდება, – ამის შესახებ საფრანგეთის პრეზიდენტმა, ემანუელ მაკრონმა, საფრანგეთის ქალაქ ნიცაში, ოკეანეების დაცვისადმი მიძღვნილ გაეროს კონფერენციაზე განაცხადა.

თავის გამოსვლაში საფრანგეთის პრეზიდენტმა ასევე მტკიცედ დაიცვა მრავალმხრივობის პრინციპი საერთაშორისო სისტემაში.

„ოკეანეებისთვის ბრძოლის მოსაგებად, ჩვენ გვჭირდება მრავალმხრივი თანამშრომლობის აღორძინება“, – აღნიშნა ემანუელ მაკრონმა.

საფრანგეთის პრეზიდენტი 15 ივნისს დანიის ავტონომიურ ტერიტორიას ეწვევა, სადაც გრენლანდიის პრემიერ-მინისტრ იენს-ფრედერიკ ნილსენთან და დანიის პრემიერ-მინისტრ მეტე ფრედერიკსენთან ჩრდილო-ატლანტიკური და არქტიკული უსაფრთხოების საკითხებზე მოლაპარაკებებს გამართავს.