როგორია 12 წლის გოგონას მდგომარეობა, რომელმაც ბავშვი გააჩინა

12 წლის გოგონა, რომელმაც გასულ კვირას ბავშვი გააჩინა, კლინიკიდან გაწერეს. ამის შესახებ „პრაიმტაიმს“ პირველ საუნივერსიტეტო კლინიკაში განუცხადეს.

„გოგონა და ბავშვი კლინიკიდან უკვე გაეწერნენ. ორივე თავს კარგად გრძნობს“ - გვითხრა პირველი საუნივერსიტეტო კლინიკის კლინიკურმა დირექტორმა.

ცნობისთვის, 12 წლის გოგონა არ არის ერთადერთი, რომელიც არასრუწლოვან ასაკში დედა გახდა. სტატისტიკა შემზარავია. ყოველწლიურად 100-ობით მოსწავლე სკოლაში განათლების მიღებას წყვეტს. ამის ძირითადი მიზეზი დაოჯახება და შვილის ყოლაა. არსებული სტატისტიკით, 2022 წელს 150-მდე არასრულწლოვანმა იმშობიარა.

არასრულწლოვნის ფეხმძიმობა ორგანიზმისთვის ფაქტობრივად დამანგრეველია. რისკთან არის დაკავშირებული ნაადრევი აბორტიც, რაც შესაძლოა მომავალში უშვილობის მიზეზი გახდეს. არასრულწლოვნის ორსულობისას, ნაყოფს, რომელიც განვითარებისთვის აუცილებელ მიკროორგანიზმებს საჭიროებს, ვერ მიეწოდება, ვინაიდან დედა ჯერ კიდევ თავად არის მოზარდი. შესაბამისად, ასეთ დროს, უმეტეს შემთხვევაში ნაყოფის განვითარების შეფერხება ხდება.

ინფორმაციის ნაკლებობა, საკითხისადმი არასწორი მიდგომა, სქესობრივი განათლების არქონა – ეს არის ის ძირითადი მიზეზები, რის გამოც მძიმე შედეგებამდე მივდივართ. ბავშვთა საკითხებზე მომუშავე ორგანიზაციების შეფასებით, მოზარდებს არ აქვთ ინფორმაცია, რას იწვევს ნაადრევად დაწყებული სქესობრივი ცხოვრება ან ნაადრევი ორსულობა. გამოსავალს სწორედ საგანმანათლებლო სისტემაში ხედავენ.

ფსიქოლოგები, პრობლემას ხედავენ ოჯახშიც. სპეციალისტები, მშობლებს ურჩევენ, უფრო მეტად დაუახლოვდნენ შვილებს და ესაუბრონ მათ.