ქობულეთში, სასწრაფო დახმარების ბრიგადამ სახლის პირობებში ამშობიარა ახალგაზრდა ქალი, რომლის ჰოსპიტალიზაციაც ვერ ესწრებოდა

ქობულეთში, სასწრაფო დახმარების ბრიგადამ სახლის პირობებში ამშობიარა ახალგაზრდა ქალი, რომლის ჰოსპიტალიზაციაც ვერ ესწრებოდა. დედა და ჩვილი თავს კარგად გრძნობენ.

ამის შესახებ ინფორმაციას გვერდი "შენი სიცოცხლის გადასარჩენად" ავრცელებს.

"ქობულეთის რაიონული სამსახურის მე-3 ბრიგადას განსაკუთრებული გამოძახება ჰქონდა მშობიარობა. ახალგაზრდა ქალი მეოთხე ბავშვზე იყო ორსულად.

ექიმი ელეონორა ცაცანიდი: "გამოძახების ადგილზე მისულებს, საცხოვრებელ კორპუსთან აღელვებული სამეზობლო დაგვხვდა. პაციენტის მდგომარეობის შეფასებისას აღმოჩნდა, რომ ახალგაზრდა ქალს დაწყებული ჰქონდა მშობიარობა და მის ჰოსპიტალიზაციას ვეღარ მოვასწრებდით."

ბრიგადის წევრები მაშინვე მობილიზდნენ და ადგილზე მშობიარისთვის უსაფრთხო გარემო შექმნეს.

ყველა ერთდროულად და პროფესიონალურად მოქმედებდა და იმ პატარა სივრცეში, ხალხის სითბოსა და ბრიგადის სისწრაფეს შორის, დაიბადა ჯანმრთელი გოგონა.

ექთანი დედას უტარებდა საჭირო სამედიცინო მანიპულაციას, ექიმი ბავშვს და პროტოკოლით გათვალისწინებული დახმარების შემდეგ დედა და ახალშობილი ქობულეთის ერთ-ერთ სამშობიაროში იქნენ გადაყვანილნი.

მოგვიანებით ექიმმა კიდევ ერთხელ მოიკითხა მისი პაციენტები - ორივე თავს კარგად გრძნობენ და უკვე სახლში იმყოფებიან.ექიმი ელეონორა ცაცანიდი მე-8 წელია რაც სასწრაფო დახმარების ექიმია, მისთვის ეს მშობიარობის მიღების პირველი შემთხვევა გახლავთ და როგორც თავად ამბობს: "ასეთი მომენტები გვახსენებს, რატომ აქვს სიცოცხლეს ყველაზე დიდი ხმა," - წერს გვერდი "შენი სიცოცხლის გადასარჩენად" სოციალურ ქსელში.