უკრაინის NATO-ში გაწევრიანებასთან დაკავშირებით კონსენსუსი არ არსებობს - მარკ რუტე

უკრაინის NATO-ში გაწევრიანების საკითხზე კონსენსუსი ჯერ არ არსებობს, – ამის შესახებ NATO-ს გენერალურმა მდივანმა, მარკ რუტემ ალიანსის საგარეო საქმეთა მინისტერიალის წინ გამართულ პრესკონფერენციაზე განაცხადა.

„პრაქტიკული სიტუაცია, როგორც მოგეხსენებათ, ასეთია, რომ უკრაინის NATO-ში გაწევრიანებისთვის ყველა მოკავშირის მხრიდან კონსენსუსია საჭირო. ამჟამად კი, როგორც მოგეხსენებათ, უკრაინის NATO-ში გაწევრიანებასთან დაკავშირებით კონსენსუსი არ არსებობს“, – განაცხადა მარკ რუტემ.

ამასთან, როგორც რუტემ აღნიშნა, ყველა მოკავშირე აღიარებს, რომ უკრაინისა და ალიანსის უსაფრთხოება მჭიდროდ არის ურთიერთდაკავშირებული, ამიტომ, „ნატო ცდილობს, უკრაინაში ომი ხანგრძლივი და სამართლიანი მშვიდობით დაასრულოს“.

როგორც ალიანსის გენერალურმა მდივანმა აღნიშნა, ამ მხრივ ნატო მიესალმება პრეზიდენტ ტრამპის ძალისხმევას.

NATO-ს საგარეო საქმეთა მინისტერიალი ბრიუსელში ხვალ გაიმართება. აღსანიშნავია, რომ შეხვედრას არ ესწრება აშშ-ის სახელმწიფო მდივანი მარკო რუბიო. როგორც მარკ რუტემ აღნიშნა, მინისტერიალში მონაწილეობას მიიღებს სახელმწიფო მდივნის მოადგილე კრისტოფერ ლანდაუ.