2-თვიანი ძებნის შემდეგ 87 წლის ქალი გარდაცვლილი იპოვეს
1764408515
საქართველოს განათლების, მეცნიერებისა და ახალგაზრდობის მინისტრი გივი მიქანაძე ბათუმის შოთა რუსთაველის სახელმწიფო უნივერსიტეტის 90 წლის იუბილესადმი მიძღვნილ ღონისძიებას დაესწრო.
სამინისტროს ინფორმაციით, გივი მიქანაძემ სიტყვით გამოსვლისას პროფესორ-მასწავლებლებს, სტუდენტებსა და დამსწრე საზოგადოებას საიუბილეო თარიღი მიულოცა და უნივერსიტეტის განვითარების საქმეში შეტანილი განსაკუთრებული წვლილისთვის მეცნიერებსა და ახალგაზრდებს მადლობის სიგელები გადასცა.
„დიდმა მამულიშვილებმა, აჭარის მაშინდელმა სამეცნიერო საზოგადოებამ - უმაღლესი საგანმანათლებლო კერის დამაარსებლებმა და მათმა თანამოაზრეებმა ძალისხმევა არ დაიშურეს, რომ ბათუმის სახელმწიფო უნივერსიტეტი აჭარაში მთავარი უმაღლესი განათლების ცენტრი, ეროვნული ღირებულებების დამკვიდრებისა და კულტურის კერა გამხდარიყო.
საამაყოა, რომ დღეს ქვეყანაში გვაქვს ასეთი მდიდარი ტრადიციების მქონე უნივერსიტეტი, რომელმაც ბევრი ცნობილი მეცნიერი, ღვაწლმოსილი პედაგოგი და სახელოვანი მამულიშვილი აღუზარდა ქვეყანას. ეს ტრადიციები ღირსეულად გრძელდება და ბათუმის სახელმწიფო უნივერსიტეტში, რომელიც შოთა რუსთაველის სახელს ატარებს, 90 წლის შემდეგაც აკადემიურ ცოდნას ათასობით სტუდენტი იღებს. მათ განათლებაზე ზრუნავენ პროფესიონალი, მაღალი კვალიფიკაციის მქონე პროფესორ-მასწავლებლები და მეცნიერ-თანამშრომლები“, - განაცხადა გივი მიქანაძემ.
საიუბილეო საღამოზე აჭარის ა.რ. განათლებისა და სპორტის სამინისტროს სიგელით სასწავლო-სამეცნიერო საქმიანობაში შეტანილი განსაკუთრებული წვლილისთვის დაჯილდოვდნენ პროფესორ-მასწავლებლები და მეცნიერები. ასევე, უნივერსიტეტის საპატიო ჯილდო - შოთა რუსთაველის მედალი გადაეცა აკადემიურ და სამეცნიერო პერსონალს და შეირჩა 17 საპატიო დოქტორი.
დამსწრე საზოგადოებას სიტყვით ასევე მიმართეს და უნივერსიტეტს იუბილე მიულოცეს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ და აჭარის განათლებისა და სპორტის მინისტრმა მაია ხაჯიშვილმა.
საიუბილეო თარიღთან დაკავშირებით ბათუმის შოთა რუსთაველის სახელობის უნივერსიტეტში მრავალფეროვანი ღონისძიებები მოეწყო: გაიმართა ფოტოგამოფენა „ბსუ 90“ და სპეციალურად მოწყობილ სამეცნიერო კარვებში სტუმრებმა უნივერსიტეტის საფაკულტეტო და კვლევითი მიმართულებების სამეცნიერო მიღწევები და ინოვაციური პროექტები დაათვალიერეს.
საიუბილეო ღონისძიებას, რომელიც ბათუმის ილია ჭავჭავაძის სახელობის სახელმწიფო დრამატულ თეატრში გაიმართა, ესწრებოდნენ აღმასრულებელი, საკანონმდებლო და ადგილობრივი ხელისუფლების წარმომადგენლები, უნივერსიტეტების რექტორები, დიპლომატიური კორპუსისა და პარტნიორი ორგანიზაციების წარმომადგენლები, სასულიერო პირები, სტუდენტები, პროფესორ-მასწავლებლები და უცხოელი სტუმრები.
