2019 წელს ოჯახურ დანაშაულს 7 ქალი ემსხვერპლა

15:06 02-13-2020
77

შინაგან საქმეთა სამინისტროს ინფორმაციით, 2019 წელს ოჯახურ დანაშაულს 7 ქალი ემსხვერპლა. უწყების განცხადებით, 2018 წელსაც ამდენივე ქალი მოკლეს, წინა წლებში კი მაჩვენებელი ორმაგი იყო.

2019 წელს ოჯახში ძალადობისა და ოჯახური დანაშაულის 6000-ზე მეტ ფაქტზე დაიწყო გამოძიება. 2018 წელს გამოძიება დაიწყო 5621 შემთხვევაზე.

2019 წელს, შინაგან საქმეთა სამინისტროს ტერიტორიული ორგანოების, ადამიანის უფლებათა დაცვისა და გამოძიების ხარისხის მონიტორინგის დეპარტამენტისა და საქართველოს გენერალური პროკურატურის კოორდინირებული მუშაობის შედეგად, ოჯახში ძალადობისა და ოჯახური დანაშაულის ჩადენისთვის ბრალი წარედგინა 4564 პირს. უმეტესი მათგანის მიმართ გამოყენებული იქნა დაკავების ღონისძიება. 2018 წელს სისხლისსამართლებრივი დევნა დაიწყო 3955 პირის მიმართ.