ბიჭვინთაში ცოლთან ერთად გადაღებული მიშა თუმანიშვილის ფოტოს ისტორია

18:26 01-06-2020
33019

სოციალურ ქსელში დიდი რეჟისორის - მიხეილ თუმანიშვილის საინტერესო ფოტოს გადავაწყდით. ფოტოზე მაესტროს ცოლი ეხუტება. „პრაიმტაიმმა“ ფოტოს ავტორს მიაკვლია. ბიჭვინთაში გადაღებული ეს კადრი ექიმ მანანა შველიძეს ეკუთვნის. ქალბატონი მანანა რეჟისორის ქალიშვილის მეგობარი აღმოჩნდა.

მანანა შველიძე: - ბიჭვინთაში ზაფხულს არა მხოლოდ ჩვენი ქვეყნის ვარსკვლავები, არამედ ყოფილი საბჭოთა კავშირის ცნობილი ადამიანები ატარებდნენ. 80-იანი წლებიდან ვიცნობდი ლიკას, მიშა თუმანიშვილის ქალიშვილს. ერთად ვატარებდით ზაფხულებს, რა დროსაც სულ სხვა ურთიერთობა ყალიბდება. დღემდე ვმეგობრობ მასთან, არაჩვეულებრივი ქალბატონია. მე ფოტოაპარატი მქონდა, ვიღებდი და ვხალისობდი. „შემოქმედებითი სახლი“ ასე ერქვა ადგილს, სადაც ეს ადამიანები ისვენებდნენ. 

ბატონ მიშას ფოტოების გადაღება მაინცდამაინც არ უყვარდა. გამიკვირდა უცებ რომ დამთანხმდა გადაღებაზე. ვთხოვე, ერთ ფოტოს გადაგიღებთ-მეთქი. სანაპიროსთან ახლოს ვიყავით, დაახლოებით 1981 წლის აგვისტო იყო... იქვე იყო მისი ცოლი ლეილა, ხელი მოკიდა, ჩაეხუტა და მეც გადავიღე. ფირს უცნაური ისტორია აქვს. დაკარგული მეგონა. ხუთი წლის წინ სრულიად შემთხვევით ვიპოვე, გავამჟღავნე და ეს ფოტოც მასზე აღმოვაჩინე.

- როგორი იყო დიდი მაესტრო თეატრს მიღმა?

- ძალიან თბილი, უკეთილშობილესი და ბავშვების მოყვარული. ერთი ფოტო მაქვს, ჩემი შვილი თმას აწიწკნის. მსგავსი კადრი ბატონ მიშაზე არა მგონია არსებობდეს. 

 

ავტორი: თამარ გონგაძე