რატომ დატოვა თაკო ჩარკვიანმა გაერთიანებული ოპოზიცია

18:06 12-03-2019
1990

„პარტია „კანონი და სამართალი“ პროპორციულ არჩევნებთან დაკავშირებით ოპოზიციის მიერ შექმნილ ფორმატს ტოვებს“, - ამის შესახებ პარტიის ლიდერმა, თაკო ჩარკვიანმა სოციალურ ქსელში დაწერა.

როგორც ჩარკვიანი წერს, ფორმატის მონაწილე ერთ-ერთი პოლიტიკური პარტიის ლიდერი მოსკოვში გაემგზავრა, რაც მიუღებელია.

„პარტია „კანონი და სამართალი“ სიურპრიზებს არ ვუწყობთ საკუთარ ამომრჩევლებს. მიგვაჩნია, რომ პირველ რიგში ანგარიშვალდებული ვართ ხალხთან, როგორც მხარდამჭერებთან, ისე კრიტიკოსებთან და მხოლოდ ამის შემდეგ კოლეგებთან. ჩვენთვის ცნობილი გახდა, რომ ერთ-ერთი პოლიტიკური პარტია, რომელთან ერთადაც ერთი მაგიდის ირგვლივ ვისხედით „ლეიბორისტული პარტიის“ ოფისში, დღეს გაემგზავრა ოკუპანტ ქვეყანაში – რუსეთში. მართალია ვერც ერთ პარტიას ვერ ვუკარნახებთ პოლიტიკური დღის წესრიგს, თუმცა აქამდეც გვიძნელდებოდა პარტნიორობა საგარეო კუთხით განსხვავებული კურსის მქონე პოლიტიკურ სუბიექტთან და მივიღეთ ურყევი გადაწყვეტილება, რომ უარი ვთქვათ ამ ფორმატში მონაწილეობაზე და დავტოვოთ იგი.  „კანონი და სამართალი“ რჩება აქამდე გაცხადებული პრინციპების ერთგული, ვრჩებით გაერთიანებაში (ძალა ერთობაშია) და ხალხთან და დასავლური ტიპის პარტიებთან ერთად ბოლომდე ვიბრძოლებთ დემოკრატიული არჩევნების ჩასატარებლად. რუსეთი, ეს არის წითელი ხაზი, სწორედ რუსეთზე ქვეყნის გადაბარების წინააღმდეგ ვდგავართ გაერთიანებული და არა პარლამენტის სკამებისთვის“, – წერს თაკო ჩარკვიანი.

შეგახსენებთ, „დემოკრატიული მოძრაობის” ლიდერი ნინო ბურჯანაძე, შვილთან - ანზორ ბიწაძესთან ერთად მოსკოვში გაემგზავრა.

„პრაიმტაიმის” ინფორმაციით, ბურჯანაძეს რუსეთის დედაქალაქში დაგეგმილი აქვს შეხვედრები პოლიტიკურ წრეებთან, მათ შორის პრეზიდენტის ადმინისტრაციაში.

ბურჯანაძის რუსეთში გამგზავრების შესახებ ინფორმაცია “პრაიმტაიმს” მისმა თანაგუნდელმა, გიორგი ახვლედიანმა დაუდასტურა. თუმცა, მისი თქმით, კონკრეტული შეხვედრების შესახებ ინფორმაცია ვიზიტის დასრულების შემდეგ გავრცელდება. 

შეხვდება თუ არა ნინო ბურჯანაძე ვლადიმერ პუტინს, ამ კითხვაზე ახვლედიანი პასუხობს, რომ ამ დონის შეხვედრას მოსამზადებელი სამუშაოები სჭირდება.