ე.წ. ლარიანი წამლები აფთიაქებში დეფიციტურია - ჯანდაცვის სამინისტროში „პრაიმტაიმს“ მიზეზები განუმარტეს

16:58 10-22-2019
92

ყოფილი პრემიერ-მინისტრის, მამუკა ბახტაძის მიერ განხორციელებული რეფორმა - „მედიკამენტები ერთ ლარად“ ხარვეზებით მუშაობს. 35 დასახელების მედიკამენტი, რომელიც მთავრობას სოციალურად დაუცველი პირებისთვის, პენსიონერებისთვისა და შშმ პირებისთვის ერთ ლარად უნდა გაეცა, სააფთიაქო ქსელებში, ხშირ შემთხვევაში, დეფიციტურია.

ჯანდაცვის პოლიტიკის სამმართველოს უფროსის მოვალეობის შემსრულებელი, ეკა ადამია „პრაიმტაიმთან“ პროგრამის ხარვეზის მიზეზებს განმარტავს.

„შეფერხებები შეიქმნა, რადგან გახანგრძლივდა შესყიდვის პროცესი, ასევე რაღაც პოზიციებზე დეფიციტი დაფიქსირდა. თუმცა, პერიოდულად ხდება სხვადასხვა მედიკამენტის შევსება. ზოგ შემთხვევაში ხელშეკრულების გაფორმების პროცესია, ზოგ შემთხვევაში მოწოდების პროცესშია და ეს დეფიციტი ბაზარზე დროში გახანგრძლივებამ გამოიწვია. თუმცა, ეს არ ნიშნავს, რომ პროგრამა ჩავარდა, რადგან ქრონიკული მედიკამენტებით უზრუნველყოფა კვლავ პრიორიტეტად რჩება. ჩვენ ამ პროგრამის განვითარებაზე ვმუშაობთ“, - ამბობს ადამია.

მისი განმარტებით, სხვადასხვა აფთიაქში შეიძლება სხვადასხვა მედიკამენტის დეფიციტი იყოს ამ წუთას, ამიტომ კონკრეტულად რომელია დეფიციტში, ვერ ასახელებს.

ზოგან - ყველაფერია, ზოგან - რაღაცები აკლია, იმის მიხედვით, მოხმარება სად უფრო დიდია“, - აცხადებს ის. 

„ამ პროგრამის მიმდინარეობამ აჩვენა, რომ სწორი გზით მივდივართ. სამიზნე მაჩვენებელს პრაქტიკულად მიახლოებული ვართ, რადგან 120 000 დარეგისტრირებული ბენეფიციარია პროგრამაში, პარალელურ რეჟიმში კმაყოფილების დონეც მაღალია. მცირე უკმაყოფილება კი ამ ბოლო პერიოდს მოჰყვა, თუმცა ძალიან მალე ამ სიტუაციას დავარეგულირებთ ზედმეტი პანიკის გარეშე. ვცდილობთ, ეს პროცესი მშვიდად გადავიაროთ“, - აცხადებს ეკა ადამია.

16 ივლისს საქართველოს ყოფილმა პრემიერ-მინისტრმა, მამუკა ბახტაძემ განაცხადა, რომ ექვსი ქრონიკული დაავადებისთვის მედიკამენტების შეძენა ყველა მოწყვლადი ჯგუფის წარმომადგენელს ერთ ლარად შეეძლება.

ამას გარდა, 35 დასახელების მედიკამენტი საზოგადოების ყველა ჯგუფისთვის ერთი ფასი იქნებოდა.