ნინოწმინდის ელექტროსადგურზე „ენერგო პრო ჯორჯიას“ თანამშრომელი გარდაიცვალა

18:17 10-20-2019
126

ნინოწმინდის სოფელ განძაში, მოვალეობის შესრულების დროს, „ენერგო პრო ჯორჯიას“ თანამშრომელს სავარაუდოდ, დენმა დაარტყა. მამაკაცი ადგილზე გარდაიცვალა. კომპანიაში ამბობენ, რომ გარდაცვლილი ქვესადგურის ოსტატი იყო. გარდაცვალების მიზეზის დადგენას სამართალდამცველებთან ერთად, კომპანიის შიდა მოკვლევის სამსახურიც აპირებს.

„გამოცდილი, დიდი ხნის თანამშრომელი იყო. სავარაუდოდ, ერთი შეხედვით, შრომის უსაფრთხოების წესების დარღვევასთან გვაქვს საქმე. თუმცა შიდა მოკვლევითაც დავადგენთ, კონკრეტულად რა დროს, რა სამუშაოს შესრულების დროს მოხდა უბედური შემთხვევა“, - გვითხრა „ენერგო პრო ჯორჯიას“ პრესსამსახურის უფროსმა ავთო დვალიშვილმა.

მომხდარზე შსს-მ გამოძიება სსკ-ის 240 პრიმა მუხლის მეორე ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს, რასაც ადამიანის სიცოცხლის მოსპობა მოჰყვა.

ავტორი: რუსკა გვარამაძე