„ღია საზოგადოება საქართველო“ - თადუმაძეს არასდროს ჰქონია პირდაპირი თანამშრომლობითი ხელშეკრულება ფონდთან

17:32 10-09-2019
1

„ღია საზოგადოება საქართველო“ შალვა თადუმაძესთან წარსულში თანამშრომლობასთან დაკავშირებით განცხადებას ავრცელებს და განმარტავს, რომ ფონდს მასთან პირდაპირი თანამშრომლობა არასდროს ჰქონია.

„პრაიმტაიმი“ განცხადებას უცვლელად გთავაზობთ:

„9 ოქტომბერს, უზენაესი სასამართლოს მოსამართლეობის კანდიდატების საპარლამენტო მოსმენისას, კანდიდატმა შალვა თადუმაძემ ლევან კობერიძის შეკითხვის საპასუხოდ აღნიშნა, რომ იგი „საკმაოდ მაღალანაზღაურებადი” იურისტის სტატუსით ჩართული იყო ღია საზოგადოების საქართველოს ფონდიდან და ცენტრალური ოფისიდან დაფინანსებულ პროგრამებში და მისი დიპლომი მაშინ არ ყოფილა ბარიერი თანამშრომლობისთვის.

ხაზგასმით გვინდა აღვნიშნოთ, რომ შალვა თადუმაძეს არასოდეს ჰქონია არც შრომითი და არც სხვა სახის პირდაპირი თანამშრომლობითი ხელშეკრულება საქართველოს ღია საზოგადოების ფონდთან. შესაბამისად, მას არასოდეს მოუწევდა დიპლომის წარმოდგენა ფონდში.

საქართველოში არსებობის 25 წლის განმავლობაში ფონდის მიერ დაფინანსებული ასობით პროექტიდან, შალვა თადუმაძე შესაძლოა ჩართული ყოფილიყო რომელიმე პროექტის განხორციელებაში. ასეთ შემთხვევაში ფონდი არასოდეს ითხოვს პროექტში ჩართული პირების დიპლომებს და ენდობა წარმოდგენილ პროფესიულ რეზიუმეს“,- ნათქვამია „ღია საზოგადოება საქართველოს“ მიერ გავრცელებულ განცხადებაში.