ძაღლების ჩხუბის გამო დაჭრილი ბიჭის მდგომარეობა კრიტიკულია - რას ამბობენ ექიმები

21:52 08-13-2019
391

ღუდუშაურის კლინიკის ექიმის განცხადებით, 17 წლის ბიჭის მდგომარეობა, რომელიც ჩიქობავას ქუჩაზე დაჭრეს, კრიტიკულად მძიმეა.

„ახალგაზრდის ჯანმრთელობის მდგომარეობა საკმაოდ მძიმეა, რეანიმაციულ განყოფილებაშია მოთავსებული, კომატოზურ მდგომარეობაში, მიმდინარეობს შესაბამისი მკურნალობა, - აცხადებენ კლინიკაში.

შსს-მ ბრალდებული უკვე დააკავა. ის 1982 წელს დაბადებული პირია:

„გამოძიებით დადგინდა, რომ ბრალდებულმა დ.რ-მ მიმდინარე წლის 9 აგვისტოს, ურთიერთშელაპარაკებისას, სანადირო თოფიდან გასროლით 2002 წელს დაბადებული ე.ჩ. დაჭრა და შემთხვევის ადგილიდან მიიმალა. სამართალდამცველებმა დ.რ. მომხდარიდან მალევე, ცხელ კვალზე დააკავეს„- აცხადებენ შსს-ში.

უწყების ინფორმაციით, ნივთმტკიცებად ამოიღეს დანაშაულის ჩადენის იარაღი -  ორლულიანი სანადირო თოფიც.

გამოძიება  სისხლის სამართლის კოდექსის 19-108-ე მუხლით მიმდინარეობს, რაც განზრახ მკვლელობის მცდელობას გულისხმობს. დანაშაულის დამტკიცების შემთხვევაში ბრალდებულს 7-დან 15 წლამდე ვადით თავისუფლების აღკვეთა ემუქრება.