ორ მეგობარ ქვეყანას შორის ურთიერთობების გართულება სხვა ქვეყნის ინტერესებში შედის-ილია მეორე

22:19 05-27-2019
57

დავით გარეჯის სამონასტრო კომპლექსთან დაკავშირებით საპატრიარქო ოფიციალურ განცხადებას ავრცელებს, სადაც ნათქვამია, რომ აზერბაიჯანსა და საქართველოს შორის სერიოზული პრობლემების შექმნა  სხვა ძალას სურს. საპატრიარქოში დღეს მამა მიქაელ ბოტკოველმა პატრიარქის წერილი წაიკითხა. 

„ბოლო დროს გარეჯის მრავალმთის უდაბნოსთან დაკავშირებით, განვითარებული მოვლენების ანალიზი ტოვებს შთაბეჭდილებას იმისა, რომ, საეკლესიო თემიდან გამომდინარე, აზერბაიჯანსა და საქართველოს შორის სერიოზული პრობლემების შექმნა სურს სხვა ძალას, რომელიც თავისი მიზნის განხორციელებისთვის, სამწუხაროდ,დასაყრდენს პოულობს როგორც ერთ, ისე მეორე ქვეყანაში.

მაგრამ პროვოკაციებს ადვილად არ უნდა ავყვეთ!

მაშინ, როდესაც სახელმწიფოთა შორის მიმდინარეობს მოლაპარაკება, როდესაც ეკლესია ჯერ არ ჩართულა განხილვებში,როდესაც არსებობს აზერბაიჯანულ მხარესთან ურთიერთობის არაერთი საშუალება,  როდესაც შესაძლებელია საერთაშორისო ორგანიზაციებისა და მეგობარი ქვეყნების დახმარებით პრობლემის ცივილურად და სამართლიანად გადაწყვეტა, ამ რესურსების უგულვებელყოფა და მკვეთრი განცხადებებისა და ქმედებების განხორციელება სწორედაც,რომ ჩვენს ეროვნულ ინტერესებს ეწინააღმდეგება. ვფიქრობთ, დაძაბულობის კერის შექმნა აზერბაიჯანული მხარისთვისაც მიუღებელი უნდა იყოს.

მივმართავთ ყველას, ვისთვისაც მტკივნეულია ეს პრობლემა, აუცილებელია შევინარჩუნოთ სიმშვიდე; აუცილებელია გამოვიჩინოთ მეტი კეთილგონიერება და მოქალაქეობრივი პასუხისმგებლობა, განსაკუთრებით მოვუწოდებ სასულიერო პირებს და მრევლს. ასევე მივმართავთ როგორც საქართველოს, ისე აზერბაიჯანის ხელისუფალთ, წარმართონ ინტენსიური მოლაპარაკებები სამართლიანობის დასადგენად, რათა ჩვენს ხალხებსა და ქვეყნებს შორის არსებული მეგობრული ურთიერთობა შენარჩუნდეს და გაღრმავდეს.

თავის მხრივ, საქართველოს ეკლესია გამოთქვამს მზადყოფნას, აქტიური მონაწილეობა მიიღოს ამ პროცესში და ვიმედოვნებთ, ორივე მხარე ღვთის წყალობით, შევძლებთ პრობლემების დაძლევას.ამასთან,  აზერბაიჯანის ხელისუფლებასა და ხალხს ვულოცავთ დამოუკიდებლობის დღეს და ვუსურვებთ მშვიდობასა და კეთილდღეობას.-ნათქვამია პატრიარქის  განცხადებაში.

კითხვაზე,  სხვა ძალაში ხომ არ იგულისხმება რუსეთის ფედერაცია, საპატრიარქოს ოფიციალური სპიკერი დეკანოზი მიქაელ ბოტკოველი პასუხობს:

საქართველოში არსებული კონფლიქტები ძალიან ხშირად იყო სხვა ძალის მიერ ინსპირირებული, ამიტომაც ვფიქრობთ რომ ორ მეგობარ ქვეყანას შორის ურთიერთობების გართულება სხვა ქვეყნის ინტერესებში უნდა შედიოდეს.