თბილისის ზოოპარკის სპილოს ამბავი მსოფლიომ გაიგო - ნახეთ პირველი კადრები ფილმიდან

14:35 05-22-2019
1452

გასული წლის ოქტომბერში სპილო გრანდს ეშვის ამოღების ურთულესი ოპერაცია ჩაუტარდა. ოპერაციას BBC-ის გადამღები ჯგუფიც დაესწრო და ახალ სერიალში „დიდი ცხოველების ოპერაციები“ (Big Animal Surgery) გრანდის ისტორიას ერთი სრული ეპიზოდი დაეთმო. ფილმს ხვალიდან ინგლისში აჩვენებენ, ინფორმაციას ამის შესახებ თბილისის ზოოპარკი ავრცელებს.

„ჩვენი სპილო გრანდის ოპერაციაზე რომ BBC-იმ დოკუმენტური ფილმი გადაიღო, ხომ გახსოვთ?

ჰოდა, ის დროც დადგა, როცა გრანდის ამბავი მსოფლიომ უნდა გაიგოს!

ფილმს ხვალიდან, ჯერჯერობით მხოლოდ ინგლისში აჩვენებენ. ჩვენი სპილოს ეპიზოდი 6 ივნისს, ინგლისის დროით 21:00 საათზე გავა BBC Two-ზე. ცხადია, შემდეგ აქაც გამოვფენთ და ყველას გექნებათ ნახვის შესაძლებლობა.

პრემიერამდე BBC-იმ ფილმის პატარა მონაკვეთი გაავრცელა, გრანდის წამოდგომის ემოციური კადრებით, რომელსაც თქვენც გიზიარებთ“, - წერს თბილისის ზოოპარკი.

სპილო გრანდი 23 წლისაა, ის საქართველოში რამდენიმე წლის წინ ერევნის ზოოპარკიდან ჩამოიყვანეს. მას ორი ეშვი ჰქონდა დაზიანებული. პირველი ოპერაცია, რომელიც 11 საათს გაგრძელდა, ბრიტანელმა ექიმებმა, 2014 წელს წარმატებით ჩაატარეს და „გრანდს“ ერთი დაზიანებული ეშვი ამოუღეს.