რა ხდება საწამებელი საკნების შიგნით - ასადის სისხლიანი რეჟიმის დღემდე უცნობი ფაქტები

12:14 05-13-2019
11

იურიდიული ფაკულტეტის სტუდენტი ოფიცრებმა მაჯებით ჩამოკიდეს, ცემით დაასისხლიანეს, ელექტრო შოკით აწამეს და პირში თოფი ჩაუდეს.

სირიელი სტუდენტის, მუჰანად ღაბაშის ისტორიას New York Times წერს თავის ახალ ანგარიშში, სადაც ბაშარ ალ ასადის რეჟიმს პატიმრების წამებაში ამხელს.

სირიის უსაფრთხოების სამსახურები, საიდუმლო საკანში მოთავსებულ სტუდენტს 12 დღის განმავლობაში აწამებდნენ. მისი რეალური დანაშაული მშვიდობიანი, ანტისამთავრობო აქციის ორგანიზება იყო, თუმცა მუჰანადი მანამ აწამეს, სანამ ყალბი ჩვენება არ მისცა და განაცხადა, რომ აფეთქებებს გეგმავდა.

სტუდენტი იხსენებს, რომ იგი დამასკოში მდებარე საჰაერო ბაზაზე განლაგებულ საიდუმლო ციხეში მოათავსეს. დაცვის თანამშრომლებმა იგი სხვა პატიმრებთან ერთად გააშიშვლეს და ღობეზე ჩამოკიდეს. ყოველ ღამე, სიცივეში, მათ ყინულოვან წყალს ასხამდნენ. ოფიცრები გართობის მიზნით, პატიმრებს აიძულებდნენ ძაღლის, ვირის და კატების როლი შეესრულებინათ.

წამების მეთოდად ციხეებში ასევე იყენებენ გაუპატიურებას და ხშირად, პატიმრებს ერთმანეთის ცემას ან მოკვლასაც აიძულებენ.

31 წლის მუჰანად ღაბაშის თქმით, სამხედრო საავადმყოფოში მოხვედრილ პატიმრებს, ტკივილგამაყუჩებლებსაც არ აძლევდნენ და მის თვალწინ, 19 თანამესაკნე, სხვადასხვა დაავადებით გარდაიცვალა.

სირიელმა სტუდენტმა ასადის რეჟიმის ციხეში 19 თვე გაატარა და მხოლოდ მოსამართლის მოქრთამვის შემდეგ დააღწია საკანს თავი.

მართალია, სირიის სამოქალაქო ომი უკვე მეცხრე წელს ითვლის და ბაშარ ალ ასადის რეჟიმმა ოპოზიციური ძალები თითქმის უკვე დაამარცხა, თუმცა New York Times-ის ანგარიშში ნათქვამია, რომ სირიის ხელისუფლების მიერ, პოლიტიკური ნიშნით და ცრუ ბრალდებებით დაკავებული ადამიანების რიცხვი იზრდება.

ანგარიში ასადის რეჟიმის ყოფილი პატიმრების შემზარავ ჩვენებებს ეყრდნობა. მათ სირიის სახელმწიფო დაზვერვის კუთვნილ ციხეებში აწამებდნენ. New York Times-ის თანახმად, 2011 წლიდან დღემდე, საიდუმლო საწამებელ საკნებში ათასობით პატიმარი მოხვდა და მათგან მხოლოდ რამდენიმე ასეული გადარჩა.

New York Times-მა მოიპოვა დოკუმენტები, ჩანაწერები, რომელთაც სირიის სამხედრო დაზვერვის სამსახურის უფროსი აწერს ხელს. დოკუმენტებში მოცემულია ინფორმაცია საკნებში დაღუპული პატიმრების შესახებ.

სირიის ციხეებში დაკავებული პატიმრების ზუსტი რაოდენობა უცნობია. თუმცა სირიის ადამიანის უფლებათა დაცვის ქსელის მონაცემებით, 8 წლიანი კონფლიქტის განმავლობაში, 128 000 ადამიანი დააკავეს და მათგან 60 000-ზე მეტი მოკლეს. წამების შედეგად დაღუპულთა რაოდენობა დაახლოებით 14 000-ს შეადგენს.

სირიის მთავრობის საკნებში, წამების გარდა, სიკვდილიანობას იწვევს გარემო პირობებიც. გაეროს ინფორმაციით, პატიმრებს არ ასმევენ წყალს, არ აწვდიან საკვებსა და ტანსაცმელს, მათ არც საბნები აქვთ. New York Times-ის თანახმად, ანტისანიტარიისა და სამედიცინო დახმარების არარსებობის გამო, ციხეში ასობით პატიმარი იღუპება.

სირიის მთავრობა უარყოფს პატიმრებზე სისტემატურ ძალადობასა და მათზე წამებას, თუმცა, ცოტა ხნის წინ, ასადის რეჟიმმა, ასობით დაღუპული პატიმრის გარდაცვალების ცნობა გამოსცა.

სირიის ხელისუფლებასა და ამბოხებულებს შორის კონფლიქტი 2011 წლის 15 მარტს დაიწყო და მას შემდეგ გრძელდება. ბაშარ ალ ასადს, ოპოზიციური ძალების წინააღმდეგ ბრძოლაში, რუსეთი ეხმარება. კონფლიქტმა ათასობით მშვიდობიანი მოქალაქე იმსხვერპლა, 6 მილიონზე მეტი სირიელი კი დღეს დევნილია.