ვისთვის არის აუცილებელი და ვინ არ შეიძლება ჩაიტაროს წითელას აცრა

13:59 01-18-2019
2858
თეგები: წითელააცრა

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, მათ ვისაც 5 წლის ასაკამდე წითელას საწინააღმდეგო გეგმური ვაქცინა გაკეთებული აქვს, დამატებით აცრას აღარ საჭიროებს.

„ქვეყანაში ეპიდაფეთქება ძირითადად ლოკალიზებულია და ყველაზე მეტი შემთხვევა იმერეთში, სამეგრელოში, კახეთსა და თბილისში ფიქსირდება. ამ რეგიონებში მეტი ინტენსივობით მიმდინარეობს ეპიდსაწინააღმდეგო ღონისძიებები. ასევე აბსოლუტურ რიცხვში ყველაზე მეტი შემთხვევა გვაქვს 20-დან 40 წლამდე ასაკის პირებში, თუმცა თუ რაოდენობას მაჩვენებლებში გადავიყვანთ, ყველაზე მეტი შემთხვევა 1 წლამდე ასაკის ბავშვებშია. ჩვენი კალენდრის მიხედვით, წითელას საწინააღმდეგო ვაქცინაცია ერთი წლისა და 5 წლის ასაკში კეთდება. როგორც წესი, წითელას საწინააღმდეგო ანტისხეულები დედიდან შვილს გადაეცემა და ბავშვი დაცულია დაახლოებით 8-9 წლის ასაკამდე, თუ დედას აღნიშნული დაავადება ჰქონდა ან მის საწინააღმდეგოდ არის აცრილი. ის ფაქტორი, რომ 0-დან ერთ წლამდე ასაკის ბავშვებში წითელას გავრცელების მაჩვენებელი მაღალი გვაქვს, მიუთითებს იმაზე, მათი დედები არაიმუნურები არიან. ამიტომ იმ ქალებს, ვინც ოჯახი უნდა შექმნან და შვილები გააჩინონ, დადასტურებით თუ არ იციან, რომ წითელას საწინააღმდეგოდ აცრილები არიან, ყველას ვთხოვთ, რომ პოლიკლინიკებში მივიდნენ და ვაქცინა ჩაიტარონ. ვაქცინის მარაგი ქვეყანაში საკმარისია”, - განაცხადა ამირან გამყრელიძემ.

მისი თქმით, ორსულობის დროს წითელას საწინააღმდეგო აცრის ჩატარება არ შეიძლება. 

"თუ ადამიანი გეგმავს ორსულობას აუცილებელია, ქალბატონმა თუ არ არის აცრილი, ორსულობამდე მინიმუმ ერთი თვით ადრე გაიკეთოს წითელას საწინააღმდეგო აცრა. ორსულობის პერიოდში გრიპის სანიწააღმდეგო აცრა უნდა გაიკეთონ" - განაცხადა გამყრელიძემ. 

რაც შეეხება ლაქტაციის პერიოდში წითელას საწინააღმდეგო აცრის ჩატარებას, ამირან გამყრელიძის თქმით, ორსულობის პერიოდის შემდეგ შესაძლებელია.  

აღსანიშნავია, რომ 1-ელი იანვრიდან დღემდე საქართველოში წითელას 335 შემთხვევა დაფიქსირდა.