"პირად ცხოვრებაზე იქ საუბარი არ ყოფილა, უბრალოდ სირცხვილია..." - ნიკა გვარამიამ ის მიზეზები დაასახელა, რის გამოც დეკანოზი ციხეში ზის

21:42 03-17-2018
343

„გიორგი მამალაძემ გაშიფრა ფინანსური სქემები მითვისებების საპატრიარქოში,“ - ეს განცხადება "რუსთავი 2"-ის გენერალურმა დირექტორმა, ნიკა გვარამიამ, შაბათის კურიერში გააკეთა.

ნიკა გვარამია დეკანოზ გიორგი მამალაძეს მატროსოვის ციხეში შეხვდა და მისგან გარკვეული ინფორმაცია მიიღო, თუმცა, კონკრეტულ დეტალებზე, ჯერჯერობით, არ საუბრობს.

დეკანოზმა ფინანსური სქემები გაშიფრა და გვარამიას თქმით, ამ სქემის მონაწილეები ეკლესიის მაღალჩინოსნები არიან.

„ეკლესიის მაღალჩინოსნები ნამდვილად არიან დასახელებული, არავითარ პირად ცხოვრებაზე იქ საუბარი არ ყოფილა, უბრალოდ სირცხვილია. ეს ადამიანი იქ ზის იმიტომ, რომ გაშიფრა მაღალი ეკლესიური თანამდებობის პირების მიერ ეკლესიის ქონების დატაცება და ამის უტყუარი საბუთები აქვს,“ – განაცხადა ნიკა გვარამიამ.

ნიკა გვარამიას თქმით, ეს ყველაფერი პატრიარქს უამბო და პატრიარქის პოზიციაც მოისმინა.

ავტორი: ლილუ მიროტაძე