"მოსკოვიდან დამირეკეს და მითხრეს, რომ არჩილ ტატუნაშვილის ცხედარს ხვალ მის ოჯახს გადასცემენ..." - ვალერი კვარაცხელია

15:47 03-05-2018
76

პარტია „ნეიტრალური საქართველოს“ თავმჯდომარე ვალერი კვარაცხელიას ინფორმაციით, ოკუპირებულ ცხინვალში გარდაცვლილი არჩილ ტატუნაშვილის ცხედარს ოჯახს ხვალ გადასცემენ.

ამის შესახებ კვარაცხელია "ფეისბუქის" პირად გვერდზე წერს. 

"გუშინწინ ახალგორიდან დამიკავშირდნენ ცხინვალში დაღუპული არჩილ ტატუნაშვილის ოჯახის ახლობლები, რომლებმაც მთხოვეს მოსკოვში ჩემი კავშირების გამოყენებით, არჩილის ცხედარის გადმოსვენებაში დახმარების გაწევა.

მათ ვუთხარი, რომ ჩემი შესაძლებლობები ალბათ არ იქნებოდა საკმარისი ამ საკითხის გადასაწყვეტად, მაგრამ, რა თქმა უნდა, მაინც შვაწუხე ჩემი მოსკოველი მეგობრები რუსეთის სახელმწიფო დუმაში და ვთხოვე დახმარების გაწევა.

დღეს, 5 მარტს, 14 საათზე მოსკოვიდან დამირეკეს და მაცნობეს, რომ საკითხი გადაწყვეტილია და, ხვალ, 6 მარტს არჩილ ტატუნაშვილის ცხედარს მის ოჯახს გადასცემენ. არჩილ ტატუნაშვილის ოჯახს ვუსამძიმრებ იმ უდიდესი ტრაგედიის გამო, რომელიც მათ დაატყდათ თავს. 

მადლობა ჩემს მოსკოველ მეგობრებს, რომლებიც ყურადღებით და გულისხმიერად მოეკიდნენ არჩილ ტატუნაშვილის ოჯახურ ტრაგედიას და დაგვეხმარნენ საკითხის გადაწყვეტაში.

იმედი მაქვს, რომ საქართველოს მიერ მეოთხედი საუკუნის განმავლობაში ნატარები უთავბოლო პოლიტიკის უმძიმეს შედეგებს ასე სათითაოდ და ცალ- ცალკე კი არა, მალე, მთლიანად და კომპლექსურად აღმოვფხვრით და ოსებთან, აფხაზებთან და რუსებთან ასე საშინლად გაფუჭებული ურთიერთობების მოწესრიგების გზით ვივლით", - წერს კვარაცხელია. 



ავტორი: ლილუ მიროტაძე